Page 53 - MIN ON

Gobierno ta recluta cuidado di preso pa KIA

Tuesday, 20 December 2016 19:36
Comparti

Gobierno di Aruba, por medio di Minister mr. Drs. Arthur Dowers ta yama tur cu ta interesa pa un
funcion di colaborado Penitenciario, miho conoci como cuidado di preso, pa solicita pa un traboo na
Korrectie Instituut Aruba, KIA. E departamento ta ocupa su mes cu ehecucion di detencion temporario di
sospechosonan y ehecucion sin interupcion di castigonan y medidanan di detenidonan condena.

Como cuidado di preso ta exigi un educacion basico penintenciaro di 2 aña (PBO). Despues di caba e
parti teoretico lo haci practica di mey aña den e seccion di detencion y mey aña den e seccion di
proteccion y siguridad. Despues di logra un conseho positivo di bo trabounan den practica, lo otorga un
diploma di “Educacion Basico Penitenciario”. Despues di logra e diploma PBO lo drenta den funcion sea
na seccion di detencion of seccion di proteccion y siguridad. Como cuidado di preso e funcion ta encera
vigila orden, trankilidad y siguridad den y rond di e instituto; contribui na e meta di un detencion
humano; guia y trato di detenidonan; contribui na e resocialisacion y reintegracion di detenidonan;
ehecuta trabaonan di importancia pa logra metanan di e funcion. Exigencianan pa por aplica y cuminsa
cu e curso di 2 aña ta un diploma di EPB doorstroom- of MAVO y mester ta entre 21 cu 35 aña di edad.
Pa solicita, mester manda un carta prome cu dia 9 di januari 2017, dirigi na Minister di Husticia, mr. drs.
A.L. Dowers por intermedio di Rocco Tjon, Instituto Coreccional Aruba (KIA), situa na Santo di Patia
z/n, San Nicolas, Aruba. Pa mas informacion por tuma contacto cu J. Loefstok-Frank of cu A. Panneflek,
di e departamento di Recursonan Humano na KIA na telefon 524-6381.

Por manda email tambe cu preguntanan na jennyfer.frank@aruba.gov.aw of na
arthur.panneflek@aruba.gov.aw Korrectie Instituut Aruba, KIA a muda pa su localidad na Santo di Patia
na San Nicolas dia 22 di september 1990, pues 26 aña pasa. E prizon tin un populacion di un maximo di
200 detenido, parti den detencion preventivo, seccion di hende muhe y seccion di hubentud. Na KIA tin
mas o menos 180 empleado trahando 24 ora pa dia pa garantisa siguridad y atende cu e presonan den
cuadro di e periodo cu nan mester sinta nan castigo cu e meta pa coregi nan erornan y sali atrobe como
miho ciudadanonan pa nos pais.