Page 48 - MIN SOC 20 FEB, 2017

Sector Publico y NGO’s a participa na tayer di introduccion
riba 'Metanan pa Desaroyo Sostenibel' di Nacionnan Uni

Sunday, 19 February 2017 17:21
Comparti

Recientemente un serie di tayer di introduccion riba e 'Metanan pa Desaroyo Sostenibel' di Nacionnan
Uni (SDG's) a keda organisa pa e Comision Nacional encarga cu e implementacion di e metanan
mundial, encabesa pa sra. Jocelyne Croes.

Representantenan di sector publico y organisacionnan no-gubernamental a participa na e tayer di
introduccion riba e 17 'Metanan pa Desaroyo Sostenibel' di Nacionnan Uni y a conoce e obhetivo di e
metanan pa 2030. E obhetivo di e tayernan aki tabata pa asina e dos sectornan aki por a haya mas
conscientisacion y conocemento ariba e meta y e obhetivonan di Nacionan Uni pa 2030.

Sra. Jocelyne Croes a splica cu e tayernan aki ta di importancia pa asina cuminsa crea conscientisacion
den e departamentonan gubernamental pero tambe den e organisacionnan no-gubernamental riba e
proceso di implementacion di e 'Metanan pa Desaroyo Sostenibel' aki na Aruba. Na final di februari e
Comision Nacional ta reuni cu diferente representante di sector priva pa asina por informa e sector aki. E
tayernan aki ta sirbi tambe como un preparacion pa un mision di Nacionnan Uni cu ta bin Aruba na fin
di maart pa haci un analisis riba e situacion actual na Aruba y pa por crea un strategia coherente pa cu e
proceso di implementacion di e metanan mundial.

Gobierno di Aruba, por medio di e Comision Nacional, ta trahando cu lasonan fuerte y uzando metodo di
Nacionnan Uni pa asina garantisa un implementacion exitoso di e metanan mundial aki na Aruba. E
vision cu Gobierno di Aruba ta trahando riba dje desde 2009 pa crea un sociedad sostenibel y
prosperidad comparti ta refleha den e 'Metanan pa Desaroyo Sostenibel' di Nacionnan Uni. Pa e motibo
aki Nacionnan Uni tin atencion special pa Aruba riba e proceso di implementacion di e metanan pa asina
Aruba sirbi como un ehempel pa otro islanan mirando e avancenan cu a logra y e maneho cu tin riba e
tereno aki.

Dia 21 di februari e Comision Nacional ta organisando ‘Aruba Sustainable Action Forum’ caminda e
obhetivo ta pa alinia y informa e diferente stakeholders riba e proceso di implementacion aki na Aruba. E
foro aki lo ta un evento gratis y lo tuma luga di 8.30 am pa 12.00 pm na Crystal Theater, interesadonan
cu kier participa na e foro por registra via sdgaruba@kabinet.aw