Page 21 - DESPA

No tin ningun caso di Distemper na Aruba

Wednesday, 28 December 2016 18:13
Comparti

Servicio Veterinario di Departamento di Salud Publico ta informa cu NO tin e enfermedad “Distemper”
ainda na Aruba, pero e chens t’ey ora trece cacho sea di vakantie of como parti di mudamento pa
Aruba. Veterinario Irene Croes di Veterinaire Dienst a informa cu ta wardando confirmacion di cuanto
caso di Distemper tin na Corsou pa evalua e urgencia di implementa medidanan.

Ta na su luga pa informa publico specialmente awo cu nos ta den vakantie di Pasco cu tin biahamento
cu cacho pa y for di Corsou pa Aruba of ora ta trata cualkier persona cu ta muda di Corsou pa Aruba cu
nan cacho. Asina aki facilmente por introduci Distemper na Aruba. Teniendo na cuenta e retonan cu e
enfermedad aki por trece pa cachonan di Aruba, ta anuncia cu a opta pa aplica restriccion di
importacion. Ta permiti importacion di cacho for di Corsou solamente si na momento cu e cacho a haya
vacuna contra enfermedad di cacho esaki tabata por lo menos dos biaha durante un periodo minimo di 2
siman y no mas tarda cu 1 aña entre cada vacuna contal e cacho tabata por lo menos 12 siman bieu
durante cu el a haya su prome vacuna y e delaster vacuna a wordo duna por lo menos 2 siman prome
cu e fecha di importacion. Tambe e cacho tin un chip di identificacion cu e number unico menciona riba
e declaracion di salud oficial. E restriccion di importacion ta valido pa un periodo di 6 luna. A informa tur
veterinario local di e casonan di Distemper na Corsou y cu e peticion pa informa nan clientenan di e
peliger di Distemper.

Distemper ta un enfermedad viral contagioso y serio cerca cacho y no tin cura p’e. E enfermedad no ta
afecta hende ni pushi, pero si fret (ferrets) y otro especie canino. Cacho por hay’e via aire y contacto
directo (cu animal infecta) of indirecto (uzo di baki di awa of di cuminda di otro cacho). Distemper tin 3
fase, e ta cuminsa cu keintura y hopi biaha un tiki diarea. Despues di 1 siman por nota “verkoud” pisa:
wowo sushi, nanishi ta core pus, tosamento, falta di apetit y keintura. Despues e virus ta ataca
nervionan di e cacho: temblamento di musculonan, specialmente e musculonan riba su cabes ta hopi
tipico. E enfermedad por bay mas rapido tambe y puppies por muri den menos di 48 ora. Pa mas
informacion tocante Distemper tuma contacto cu bo veterinario priva. Pa informacion tocante
biahamento cu bo cacho tuma contacto cu Veterinaire Dienst na telefon 5850400.