Page 19 - AWEM

AWEMainta Diaranson, 28 December 2016 19

Bon dia yen di alegria!

Skirbi pa: Ruthy “Lady Ruth” Vrieswijk-Bergen

AWE, den mi ultimo relato pa 2016, un poema prosa inspira di
curason pa desea un y tur cosnan bon den 2017 cu ta dilanti porta.
Nos mesun balans cu nos ta traha riba dj’e fielmente.

Nos momentonan comparti, nos momentonan cu nos a diverti.
Nada falso keto bay, nada a corta, nada poni acerca, nos a keda
mes natural. Pero no ta tur ta igual. Nos cada un tin un otro cara,
un otro personalidad y un otro caracter. Algo sumamente special.
Nos ta sernan humano unico intelectual. Manera un rosa cu ta
plama su holor di amor. Nos cu nos dedicacion.
Nos ta pa nos mes y pa otro un dushi y bunita bendicion. Pero
tambe cu nos mesun dolor.
Nos fragancia di existencia ta exigi nos responsabilidad. Tin biaha
cu amargo sabor.

Un poema den storia, na Dios tur honor y gloria. Awe hunto atrobe
un rato. Cu un poema prosa storia. Nos bida den un buki, pagi-
nanan yena di mil y un cos. Nos ta rasona nos vos. Nos ta stima,
pordona, lubida y sigui stima. Ta cosnan chikito diario cu ta pone
nos rabia y discuti.

Pero nos ta sigui ricibi. Nos ta sigui carga pasenshi y tolera esnan
un crenchi mas complica cu nos mes. Pa nos por ta manera Aruba.

Manera Aruba

Aruba dushi tera, mi Aruba stima
Awe mi ta honra bo, permitimi mi recita
Memey di hende amabel y cariñoso
Cu den nan curason, un luz
Manera e rayonan cayente de mi dushi solo
Cu ta ilumina nos mente delicado
Den mi pensamento semper bo t’ey presente
Manera e lama blauw profundo cu ta rondona
Cu ta caricia nos intencion di madura
Di ta un bon Arubiano semper
Manera e blanco di mi ternura
Cu ta sigui baila y inspira
Den mi mannan mi ta tene
Mi tesoro di alegria y creatividad
Manera e cora alegre di mi amor eterno
Cu ta cende den mi pasion iniguala
Den mi alma mi ta sinti bo anhelo, bo anticipacion
Cu ta duna mi forsa pa enfrenta tur situacion
Manera e colo geel di e flor di anglo
Cu ta rondona mi cu dushi recuerdo
Di ta positivo den mi abundancia pa ofrece paz
Mi Aruba bunita, mi Aruba dushi...
ARUBA ta ABO ta mi cas.

Pueblo di Aruba…un Bon y Feliz 2017 cu salud, amor, paz y
alegria tur dia!
Stima bo isla, bo hendenan, bo cultura cu ternura! Cu amor cu ta
dura!
Sinti den e spiel di bo alma – E profundidad alivia – E milagernan
di mas aya. Te otro aña!