Page 7 - DESPA

JACKY VAN PUTTEN, POR MANTENE

FACILIDADNAN DEPORTIVO PROME CU

TRAHA OTRO!

May 15, 2017 Admin Uncategorized Leave a comment

Pa por eherce un deporte corectamente e facildadnan ta di suma importancia pa
e atleta. Mester reconoce cu hopi a wordo inverti den crea diferente facilidad pa
deporte di calidad. Masha hopi placa destina pa deporte a bay den e
inversionnan aki. Den pasado tampe hopi a wordo haci pa illumina diferente
canchanan di bala, pero depues cu a crea e facilidadnan aki nos gobernantenan
a lubida cu mester mantene nan tambe . Asina nos por a mira diferente luznan
no ta traha mas y den cay abou mientras tur e facilidadnan mester
mantenimiento urgente. POR ta sali di e punto di bista cu mester crea un
infrastructura na unda mantenimiento y maneho di e lugarnan aki ta bay hunto .
Mester structura y separa placa di e presupuesto di deporte pa asina e
inversionnan aki no bay perdi.

Un di e problemanan mas grandi cu deporte semper ta confronta cu ne ta ora
gobiernonan cambia e continuidad den maneho ta bay perdi. Ta manera ora un
gobierno nobo sinta nan ta lubida cu placa di pueblo a wordo inverti den e
facilidadnan aki, aunke door di otro gobierno . E consecuencia lamentabel ta cu
manehonan ta wordo cambia, of mihor dicho neglisha lubidando loke ya nos tin.
Asina cada bes e deporte Arubiano ta sufri pa falta di vision a largo plaso. Esaki
mi por a mira cada bes cu gobierno cambia, trahando 34 aña den gobierno den e
departamento di deporte ,IDEFRE/IBiSA.

Ta di suma importancia pa pone full atencion riba e condicion di nos facilidadnan
existente. Mester inventarisa e condicion financiero di nos deporte prome cu
cuminsa anuncia mas proyecto miyonario sabiendo cu esnan cu nos tin awor ta
cayendo den otro pa falta di maneho y placa. Esaki ta iresponsabel y
simplemente destruccion di capital. Nos mester cu urgencia drecha, upgrate nos
facilidadnan deportivo prome y haci nan accesibel pa nos scolnan , federacion y
publico deportivo na un costo subsidia pa lotto. E facilidadnan mester bira multi
uso na unda lo brinda e posibilidad pa pratica diferente deporte.

Mester bin cu un maneho na unda mester reserva fondonan pa mantene e
facilidad deportivo nobo y existente. Si ta bay presta pa inverti den proyectonan
nobo mester mara e inversion aki tambe cu un capital pa mantene e facilidad.