Page 70 - JUS DEC 9

Reginald Danies: A keda demostra cu Aruba ta PRO Pedofiel

Thursday, 08 December 2016 21:20
Comparti

Reginald Danies a bira masha popular ora cu el a lucha, den su mesun forma, pa haya atencion di
comunidad y di husticia pa persigui e sospechoso cu lo a mishi cu su yiu(nan).

Pero e forma con a tarda y no a haci mucho caso a pone cu el a pinta tur rond cu "Aruba ta PRO
Pedofiel". E ta haya cu e caso di MC Oz tumando luga awo y mirando con tur hende ta culpa e mucha y su
mayornan, ta subraya su pensamento di e mentalidad troci di ciudadanonan.

Riba red social Danies a skirbi cu ta fresco den su memoria ainda ora cu dia 1 di januari 2016, e baby di
aña a nace di un pareha hoben, menor di edad, di cual e tata si ta mayor di edad. Tanto nan a pidi pa
persigui e homber, e tata di e baby, pasobra el a tene relacion cu un mucha muhe menor di edad. Algun
siman pasa a gara un supuesto pastoor tambe cu un mucha muhe haciendo sex den auto, Polis a bay cu e
homber sunu, tambe a pidi pa castig'e.

Pero awor cu e sospechoso ta un DJ y ta popular, diripiente ta e mucha muhe mes ta fout, e mes a buske
y si no ta e, anto culpa su mama y tata pa a permiti'e bay luganan publico den ora di anochi. Den mayoria
opinion, Osterick Jansen, MC Oz, no ta culpabel di nada y casi ta glorifik'e como victima pasobra e
mucha muhe ta parce un mayor di edad.

Reginald Danies, siendo un tata cu mester a atende cu yiu(nan) victima di abuso sexual, ta haya cu nos
comunidad mester ta mas consciente di e daño cu e actonan aki ta haci na e muchanan, na nan futuro, na
nan sentimento y asina por sigui menciona. Djis tuma un posicion dependiendo ta ken e sospechoso ta,
sin tene cuenta cu e victimanan mes, e criaturanan, e mucha muhenan cu nan bida ta marca pa
semper.....ta haci cu den futuro muchanan lo tin miedo di sali padilanti y denuncia e malhechornan.

Por crea un percepcion cu si Bo ta pastoor of tin otro funcion den comunidad, cu e ora si comunidad ta
condenabo mesora. Pero si Bo ta un hende popular, e ora tur opinion ta cambia na fabor di e malhechor y
contra e victima. Asina comunidad ta manda un señal di "mundo riba su cabes" aki na Aruba.