Page 29 - MIN ARENDS 10 MAY 2017

Profesionalnan hoben a topa cu liderazgo di partido AVP den
Co Lab

Tuesday, 09 May 2017 20:19
Comparti

E siman aki a toca turno na partido AVP pa topa cu un grupo di profesional hoben den cuadro di e
proximo eleccion parlamentario dia 22 di September.

Queeny Bergen a splica e idea ta pa e profesionalnan hoben haya un idea kico ta e pensamento di
partidonan politico cu ta participa den e proximo eleccion.

Bergen tabata moderador tambe di e evento aki cu a tuma luga den Co-Lab na Dakota. El a invita
profesionalnan hoben cu na nan turno a invita otro amistadnan hoben cu kier sa pensamento di e
partidonan politico. Asina nan a stipula mas o menos 20 pregunta, cu tabata mescos pa tur partido.
Esaki ta un idea cu a surgi for di e eleccion anterior, pero e biaha aki el a traha tempran riba dje y a
invita tur partido politico. E reaccion cu el a haya tabata positivo. “Hopi hoben profesional ta pensa otro
cu nan mayornan y no ta vota pa tradicion. Mas bien kier scucha pensamento di e partido y politiconan.
Pesey e evento aki ta importante,” Bergen a splica.
Lider di AVP Mike Eman a participa na e evento aki hunto cu coleganan Benny Sevinger y Richard
Arends. E temanan cu a bin dilanti tabata cubri diferente sector, manera Enseñansa, preocupacion pa
cu Medio Ambiente, con ta combina reapertura di e refineria cu e maneho di sostenibilidad, con ta
atende cu Caya Grandi. Pilarnan economico di Aruba y hasta e investigacion riba Minister Paul Croes. E
participantenan por a duna comentario y bin cu preguntanan adicional riba esnan cu a wordo haci door
di e moderador.

Lider di AVP Mike Eman a felicita e organisador y a haya e evento aki un exito. El a mustra e
importancia pa envolvi profesionalnan hoben y duna nan participacion den e maneho di e pais, locual
AVP ta haci. El a splica cu el a duna un presentacion con AVP ta traha pa yega na un programa di
gobernacion, cu ta conta cu participacion di e pueblo, manera cu a sosode na e evento 1000voz, cu ta
algo cu hamas a wordo haci na Aruba y otro paisnan den e area aki. “AVP a demostra di ta un partido
hopi inovativo, semper nos ta traha pa bay dilanti, pa hiba nos pais dilanti y mehora bida di nos
ciudadanonan,” Eman a bisa ta locual el a trece dilanti pa e publico di profesionalnan hoben.