Page 76 - MIN JUS

Segun observador politico: Varios publicacion y rumor falso
constata den caso di investigacion di Minister Paul Croes

Saturday, 15 April 2017 14:35
Comparti

A tuma nota di varios noticia falso y rumor rond caso di investigacion di Minister Paul Croes. Tin fuerte indicacion di
kendenan tur a orchestrá y inventa e noticianan falso aki, pero a compronde cu ta duna investigadornan e chens pa
hasi nan trabou pa despues atende cu tur e noticianan fabrica di opositornan di e Minister.

Na e momentonan aki segun a compronde, trabounan di 'buska si tin prueba' y investiga 'kiko tin di berdad' den loke
e denunciantenan a hiba pa OM, ta tumando lugar. Mester bisa si cu despues di a hasi un inval di e forma cu a wordo
hasi ta trese hopi pregunta si esaki tawata conforme ley pa trata cu un alto funcionario y su famia.

Ta constata tambe cu tin varios noticia falso, redashi rond di e caso aki. Tin corant liga na partido MEP cu ta insinua
cu Gobierno lesa Pueblo ta pagando abogado pa e Minister, locual ta carece di veracidad. Nan a skirbi cu e Minister
di trabou lo a firma 2000 "ontheffingen" siendo e Minister ta atende rond di 300 pa 400 caso pa aña y sigur cu 80 pa
90 porciento no ta bai por medio di un "ontheffing". Esaki ta un di e ehempelnan cu por constata con nan ta crea
noticia pa susha nomber di e Minister en cuestion.

Observadornan ta indica cu na e forma con a drenta e cas di e Minister, ta parse cu nan a bay busca "cosnan" cu no a
haya, pues ni arma, placa, of droga of whatsoever na su cas, esaki ta un hecho cu opositornan lo mester biba cune. Cu
e caso tin di haber cu cargacion di droga ta otro mentira fabrica cierto 'medio di comunicacion' cu ta troce berdad.

Mirando tur e fabricacionan aki, observadornan politico ta bisa cu ta mustra cu e hoben politico a bira un 'target
politico' mirando aña di eleccion y cu mester buska tur forma pa kibra e y su Gobierno. Hasta tin ta mire como un
persecucion politico hopi serio y grave hamas bisto den nos sistema legal. Di parti e titular mes por bisa cu a
compronde cu e ta trankil tumando un tempo p' e y su famia y laga autoridadnan hasi nan trabou den tur trankilidad
y ta spera cu pronto e capitulo skur aki por pasa hopi liher. E Minister ta ausente den e dianan aki y lo ta biahando pa
atende e caso cu abogado. Un cos si por bisa di parti expertonan huridico cu tur esnan cu hasi nan mes culpabel di a
inventa y purba susha nomber di e persona Paul Croes, lo mester atene nan mes na e consequencianan cu ley ta
permiti.