Page 44 - VOS

Cabayistanan di Aruba a sinja di Sistema Unifica di
Juzgamento

Monday, 06 March 2017 10:02
Comparti

Ariba diadomingo Maart 5 Organisacion Caballista Arubano conhuntamente cu Confepaso, e
organisacacion international di cabaynan Paso Fino a organisa un taller pa su miembronan pa nan por
sinja tocante e sistema nobo di juzgamento cual a drenta na vigor januari 1 2017.

Como pais miembro di Confepaso, Aruba ta aplica e reglanan den tur competencia organisa pa OCA.
Despues di hopi anja, e paisnan miembro di Confepaso a logra yega na un reglamento cu lo wordo aplica
mundialmente. Esaki ta nifica cu tabata tin varios cambio den e reglamento nobo. Pa tur hende ta
informa di e cambionan aki, Confepaso hunto cu OCA a organisa un taller, caminda sr. Carlos Lemoine,
juez internacional cu mas di 45 anja di experiencia a splica kiko ta tur e reglanan nobo of reglanan cu a
wordo modifica. E taller aki tabata obligatorio pa tur montador, pero por a aprecia interes di diferente
donjo di cabay, y tambe jinete y amazona cu tabata presente pa sinja ariba e dia aki. E taller aki ta di un
importancia grandi pa asina tur hende por ta na altura di e cambionan y di e reglanan cu lo wordo aplica
di awor padilanti, caminda Feria Himno y Bandera lo ta e prome feria caminda lo bay usa e sistema nobo
di juzgamento. Den competencia di cabay incumplimento cu un regla por ocasiona perdida di punto, cual
na su turno por causa cu un cabay lo perde su competencia.

Tambe tabata tin e oportunidad pa hasi diferente pregunta y tambe hanja mas splicacion pa reglanan cu
no tabata mucho cla y comparti opinion. En total tabata tin un asistencia di mas cu 30 persona y e taller
mes a dura mas o menos dos ora. OCA ta yama danki na Sr. Carlos Lemoine y tambe Directora Ehecutiva
di Confepaso sra. Darcy Vergara cu a viaha bin di Panama pa ta presente pa e taller aki y tambe conose
Aruba.