Page 77 - VOS

Tratamento di Stem Cell
ta uno experimental
pesey no por a duna un
aprobación positivo

Published on March 6, 2017 in Salud/SPLASH
ORANJESTAD, Aruba

AZV no ta cubri e tratamento di stem cell, pa pashentnan di pulmon, debi cu esaki ta
den experimento ainda, segun relacionista publico di AZV, Sra. Solange Tchong.
Tambe ta asina cu ley di AZV ta difini cu tur tratamento cu por haya na Aruba, e
pashent ta haya na Aruba. Pa loke ta tratamento den exterior, AZV mester di un
evaluacion di e comision di dokter di AZV, cu yama commissie grensoverschrijdende
zorg. Den caso di Sra. Nathalie Lin, enberdad AZV a haya un peticion di specialista pa
e por haya tratamento den exterior. Pero e tratamento cu a pidi ta ser mira
mundialmente como un tratamento cu ta den su face experimental pesey no a aproba e
peticion aki. Anto esey ta nifica cu AZV di su banda no por cubri esaki, pasobra AZV ta
mara na ley, pero tambe protocolnan medico cu AZV ta traha cune. Debi cu Aruba ta
cai bao Reino hulandes, ta sigui tur loke ta sosode pa loke ta e parti di desaroyo medico
cu ta tuma luga na Hulanda. Actualmente e tratamento aki no ta ser cumbri den
Hulanda, pesey ta sigui e liñea ey cu ta haci cu AZV no por cubrie. Pesey Sra. Lin a
haya un contesta negativo di AZV.

Conseho Medico

Otro forma cu AZV ta traha cune, ta pidi conseho of recomendacionnan medico na
diferente dokter cu tin colaboracion cu nan na Hulanda y otro clinicanan cu ta traha cu
nan tanto na Corsow como Colombia. Tin caso cu e comision di AZV ta manda historia
medico di e pashent pa un dokter na Hulanda y nan ta duna conseho riba e historia. No
ta necesario cu e dokternan mester wak e pashent. Fuera di esaki e comision aki tambe
por pidi conseho na dokternan den exterior pa asina formula un miho decision. Sra.
Tchong ta sigui bisa cu diariamento AZV, ta haye cu e tipo di peticionnan aki cu sigur
no ta nada benificioso pa e pashent. Pero esaki no ta AZV so pero hopi seguro medico
rond mundo ta pasa den esaki. AZV ta mara na e cuadro cu e ley ta duna y mester
mara su mes na e exigencianan aki. Den e caso aki pa awor riba tratamento di Stem
Cell e ta uno experimental pesey no por a duna un aprobacion.