Page 10 - POST_Neat

POST ARUBA ta emiti un serie nobo di stampia ‘Casnan
Tipico Arubano 2017’

Tuesday, 25 April 2017 18:01
Comparti

Dia 28 di april 2017, Post Aruba N.V. ta emiti un serie nobo di stampia titula ‘Casnan Tipico Arubano
2017”. E serie ta consisti di 8 stampia balora na 85 cen, 90 cen, 100 cen, 130 cen, 140 cen, 200 cen, 220
cen y 320 cen, cu ta yega na un prijs total di Afl. 12,85 y e ta acompaña pa su ‘envelop di prome dia di
emision’ cu ta costa Afl. 15,85.

E diseñonan pa e stampia aki ta un creacion di Elvis Tromp y e stampianan ta imprimi na Johan
Enschedé Security Print. Dia 28 di april 2017 Post Aruba N.V lo ta cera pa motibo di un “ATV dag” y pa
es motivo aki e serie di stampia lo ta obtenibel entrante 2 di mei 2017 na e diferente oficinanan di Post
Aruba, respectivamente na Oranjestad, San Nicolas, Sta. Cruz y Palm Beach Plaza Mall. Pa mas
informacion tocante e stampianan ‘Casnan Tipico Arubano 2017’ por tuma contacto cu Departamento
Filatelico di Post Aruba N.V., cu ta situa na J.E. Irausquinplein 9, Oranjestad, cu su number di telefon
528-7678, of bishita su pagina di Facebook Aruba Stamps. E bunita serie aki no por falta den bo
coleccion. Busca esun di bo, ya cu e cantidad ta limita. Descripcion di e casnan bieu tipico di Aruba Tur
caminda riba e isla bo por mira e casnan bieu tipico di Aruba cu ta asina caracteristico pa e isla. Nan ta
consisti di un combinacion di varios tradicion di construccion, entre otro di Hulanda, Belgica y e parti
nort di Francia. E caracteristicanan di e construccion di e Indjannan tambe a hunga un papel importante.
Nan tabata construi e partinan smal di e cas semper den e direccion di e biento noordoost. P’esey e
casnan aki semper practicamente ta orienta den e direccion di oost pa west. Preferiblemente nan ta
construi e cas riba un sero. Awendia nan ta yama e cas tradicional Arubano, cu ta construi di piedra y en
particular cu e dak di panchi oranje un 'cas di cunucu'. E casnan aki tin un fogon cu scorsten y tambe un
rembak.

E fogon ta un elemento masha importante, como cu antes no tabatin instalacion di gas y mester a cushina
riba palo den e fogon. Tampoco tabatin instalacion di awa y bo mester tabatin un rembak pa warda e awa
durante e temporada di yobida, pa asina bo por uza esaki durante e temporada di secura. E casnan ta
construi cu piedranan di calki y tambe otro tipo di piedra y despues nan ta blancha nan. Nan a construi
algun parti di e casnan cu troncon di palo y takinan di mata cu nan ta vlecht den otro pa despues
combina esakinan cu torto. E caracteristica di e “cas di cunucu” bieu, ta cu e fachada generalmente ta
decora cu algun decoracion cu hopi biaha tin un nificacion simbolico relaciona cu salud y felicidad. Te
asina leu cu ta conoci, bo no ta topa e casnan unico aki na ningun otro isla. E decoracionnan den forma di
“taki y paharito” ta expresa e speransa pa un matrimonio fertil (famia grandi) mientras esun den forma
di “strea” mester core cu fucu fo’i cas. Hopi biaha e casnan aki tin un porta di “saya cu djeki”. Tabata
normal cu patras di e cas bo ta haya un bestro (wc) traha di palo of di piedra cu un secrechi di palo pa
sinta riba un bari of un buraco grandi.