Page 8 - MIN JUS 22 FEB, 2017

Fundacion Lisette

Gomes ta entrega carta

na ministerio publico

riba castigonan abou pa

abusadornan di mucha

Published on February 21, 2017 in Social/SPLASH
ORANJESTAD, Aruba

Fundacion Lisette Gomes awe tardi a tene un manifestacion dilanti Corte unda a
entrega un carta dirigi na fiscal. Segun sra. Gomes fiscal mes no tabata presente pero
Sra. Ann Angela vocero na ministerio publico, a tuma esaki den su nomber. E fundacion
awe un biaha mas a mustra nan malcontento den e protesta debi cu esnan cu ta abusa
di mucha ta haya castigonan hopi abou. Pesey nan kier a haya mas atencion riba nan
exigencianan. Aña pasa e fundacion a protesta dilanti oficina di minister y parlamento
unda a entrega un manifiesto pero te awe e la keda na promesa segun Sra. Gomes. E
puntonan cu tin den e carta dirigi na fiscal ta riba castigo abou y efectonan cu esaki tin
riba e mucha principalmente. Tambe ta menciona cu ta reina un desconfiansa den e
pueblo riba ministerio publico cu no ta duna un castigo halto na e criminalnan segun
Sra. Lisette Gomes. Sigur cu fundacion lo bai den contacto cu ministerio publico pa
haya contesta riba e carta y tambe mesun carta ta bai pa minister di husticia kende ta e
hefe di mas halto. Aruba den pasado a firma cierto tratadonan internacional cu mester
tene cuenta cu nan. Gomes ta sigui bisa cu ta e fiscalnan ta pidi castigo abao y no ta
tene cuenta cu e derecho di mucha, trapando e derechonan aki. Fundacion Lisette
Gomes lo bai tur caminda posibel cu nan mensahe y specialmente parlamento pasobra
e cambio ta serca e parlamentarionan.