Page 41 - AHATA

‘Ban Serio!’ ta estrena su ‘pop-up beach

expo 2019’

Posted on 04/16/2019 5:38 pm AST | Updated on 04/16/2019 5:39 pm AST

ORANJESTAD - Durante temporada di campamento ta hopi importante pa corda riba e
impacto grandi cu nos tin riba nos naturalesa. Den cuadro di esaki, Ban Serio! ta
organisando un tremendo Beach Expo na algun areanan di campamento e weekend largo
di Pasco Grandi. E expo lo tuma luga diasabra 20 di april na Arashi Beach, diadomingo
21 di april na Eagle Beach y dialuna 22 april na Baby Beach tur dia for di 1pm-5pm.
Entrada ta gratis y e ta apto pa tur edad.

POP-UP BEACH EXPO

Kico por spera? E exposicion lo consisti di espacionan unico unda cu tur hende cu bishita
e expo por mira e impacto cu nan tin riba nos beachnan no solamente diaramente, pero
sigur durante campamento of ora di disfruta di cualkier dia regular riba beach of di nos
naturalesa. E expo tambe lo enfoca riba con cosnan por wordo haci na un manera
diferente. E concepto ta pa ilustra ambos banda di e medaya ora ta trata e tema aki, e bon,
e malo, e limpi, sushi, saludabel y no saludabel. E expo lo cubri factornan manera kico ta
pasa ora bo laga cosnan atras y contamina nos beachnan, como tambe e diferencia cu bo
ta haci ora bo hiba tur bo pertenencianan bek cu bo den containernan re-uzabel, uza
cupnan, cuchara y otro materialnan re-uzabel.