Page 61 - ECEM JAN 16

Prome Minister Eman: Ta bay instala e cantidad mas grandi
di luznan nobo LED na Ayo, Santa Lucia y Sabanilla Abou

Sunday, 15 January 2017 20:29
Comparti

E tres barionan Ayo, Santa Lucia y Sabanilla Abou durante dos siman mas o menos lo mira presencia di
personal di ELMAR cu ta instalando puntonan di luz LED nobo den e areanan unda cu ta hopi scur.

Diabierna anochi den forma simbolico Prome Minister Mike Eman a cende e prome luz (LED) di caya
den bario di Santa Lucia. E prome luz a wordo cendi dilanti cas di sra. Myriam Werleman, mama di e
hoben Gerrick Croes. Un grupo grandi di bisiña a acudi pa presencia e ceremonia y celebra e hecho cu e
partinan di Santa Lucia, Sabanilla Abou y Ayo cu ta den scur ta haya luz.

E areanan aki Prome Minister Eman a bishita e ultimo simannan hunto cu funcionarionan di BoBario y
personal di ELMAR pa configura necesidad di e barionan ariba menciona.

Durante un bishita diaranson ultimo, a scucha for di varios habitante cu nan tin basta aña sperando pa
yegada di luz di caya. Nan deseo a wordo cumpli y e prome luz LED a keda instala dilanti cas di sra.
Myriam Werleman, kende ta esun cu a guia e accion di firma bou di e habitantenan pidiendo pa luz di
caya. “Mi por a mira con scur e area ta y sigur ponemento di e luznan lo contribui grandemente na
siguridad y e ambiente di trankilidad den e bario. Mi no por keda sin conta algo cu mi a pasa aden.
Coriendo pa bin na e sitio aki, mi por a mira con un auto por poco a dal un peaton cu tabata canando na e
banda corecto, pero door di e scuridad tabata dificil pa wak’e. Kiermen e iluminacion aki ta hopi
necesario,” Prome Minister Eman a expresa.
El a enfatisa cu iluminacion di areanan residencial ta un derecho di e ciudadanonan. E hoben Gerrick
Croes a duna un empuhe grandi den e accion y mustra riba e necesidad grandi pa iluminacion di su
bario. “Los di color politico di cualkier persona, semper nos ta duna atencion na e deseo cu tin den un
bario y den e caso aki Gerrick a cana hunto cu nos bishitando casnan puntrando riba e sitionan specifico
unda e luznan mester wordo poni. For di bishitanan nos por a saca afo cu tin hopi deseo pa otro
asistencia di parti di Gobierno, manera “verkeersplateau” pa trankilisa e trafico y nos lo bay traha riba
esaki tambe.”

ELMAR durante dos dia lo ta instalando luz na e puntonan specifico indica door di habitantenan y cu lo
ta e cantidad di mas grandi di luznan LED cu ta keda instala te awor, algo cu e habitantenan di Ayo,
Santa Lucia y Sabanilla Abou ta hopi orguyoso di dje y esaki a keda expresa pa e cantidad grandi di
habitantenan cu a acudi diabierna anochi.