Page 55 - ATA

Den e tesis aki por nota claramente con e desaroyo di un industria cultural y
creativo por aporta na diversificacion di nos economia y tambe con e por tin un
impacto socio-economico y cultural profundo, positivo y duradero riba nos
comunidad. Ta resalta tambe cu creatividad riba su mes ta un recurso
sumamente valioso y cu e ta parti di nos identidad. Sinembargo, e resultadonan
tambe ta señala puntonan di accion cu lo determina e exito di e implementacion
di un industria cultural y creativo. Cu compromiso di tur stakeholder y pa medio
di innovacion Aruba lo por desaroya un economia cu ta para pa creatividad,
cultura y inclusion di un y tur.

Go Cultura Foundation den su afan pa sostene iniciativanan cu ta stimula y
engrandece e sector cultural y creativo di nos isla, a mira importancia grandi
den e investigacion y tesis valioso aki y a dicidi di sostene Thaïs, door di laga
imprenta y publica esaki den forma di un buki. Riba e potretnan por aprecia
algun di esnan a contribui na e investigacion y realisacion di e tesis aki. Tur
persona y instancia cu a forma parti di e investigacion a ricibi un copia di dicho
publicacion for di mannan di Edjean Semeleer co-fundador di Fundacion Go
Cultura, pa asina nan tambe por sigui ta parti integral di e esfuerzonan pa sigui
desaroya e industria cultural y creativo den un pilar economico pa Aruba.

Un otro desaroyo positivo cu a resulta di e tesis ta cu Thaïs a bira un columnista
y autor di ‘Creative Islander’ pa Aruba Today. Bisemanal riba diahuebs Thaïs ta
skirbi articulonan informativo y critico pa asina conscientisa e comunidad y
tambe comparti su conocemento riba tereno di creatividad, cultura, desaroryo
sostenibel y innovacion na un manera simplistico y argumenta pa medio di
hechonan relevante.