Page 93 - KPA_Neat

Jaburibari ta pidi ayudo di Polis pa insiguridad den trafico

Sunday, 07 May 2017 21:34
Comparti

Diabierna , Polis di Bario na Jaburibari a ricibi un ciudadano, un señora di inicial C. cu a presenta cu un
peticion firma na e Polis. E ciudadano ta masha preocupa pa e forma con ta uza e caminda principal di
Jaburibari y ta pidi pa tuma accion preventivo pa evita mas desgracia.

E ciudadano a skirbi den su peticion cu e ta sinti cu por haci mas na siguridad den trafico riba e caminda aki di
Jaburibari. E mes tabata victima di un accidente riba e caminda aki y sa cu hasta morto a cay den trafico
insigur riba e caya ya menciona. E señora, durante cu e tabata entregando su carta na e Polis di Bario, a
sugeri cu autonan ta core mucho duro riba e caminda ey y como tal ta sinti cu Gobierno mester haci algo pa
evita mas desgracia.
E Polis di Bario a acepta e carta y a sigura e ciudadano cu e carta lo yega riba lessenaar di Alto Comisario
mr. Dolfi Richardson pa e tuma un decision. Sinembargo, e Polis di Bario a sigura e señora cu nan mes lo
acerca nan coleganan di e seccion di "Planologie" di e districto di Noord, pa mira na ki solucion por yega na
dje hunto cu DOW, na bienestar di e bario completo.
Di acuerdo cu e Polis di Bario, ta berdad locual e ciudadano a skirbi den su carta, esta di e insiguridad den
trafico riba e caminda di Jaburibari. Ta uza e caya comosifuera e ta un "racebaan", siendo cu esey nunca
tabata e meta di e caminda aki. E Polis di Bario a gradici e señora pa e carta, pa su sugerencia y iniciativa y a
compromete di lo haci algo. Meta di e "Polisnan di Bario" ta pa scucha critica y sugerencianan di e
habitantenan den bario y hunto cu otro departamentonan di Gobierno purba yega na solucionnan pa promove
mas siguridad den tur bario riba nos isla.