Page 8 - AWEMAINTA

8 AWEMainta Diamars, 21 Augustus 2018

Tiro cu a costa bida di adicto

Ski no tabata destina p’e

Dialuna algo pasa di 12’or di merdia, curpa sin
bida di Ski a wordo haya patras na e waf chikito di
Oranjestad. El a fayece a causa di e tiro cu el a ricibi
diasabra madruga den Ranchostraat. Un tiro cu, segun
informacion ricibi, no tabata destina p’e.

Ski a wordo tira pa un persona desconoci Diasabra den
oranan di marduga, despues di a wordo hiba hospital,
diadomingo atardi pa anochi ya caba e tabata riba
caya. E momento ey caba e tabata mustra un persona
cu tabata pasando den hopi dolor. Sinembargo por a
compronde cu e mes no tabata kier ayudo.

Dialuna merdia ta drenta e tristo noticia cu e adicto
ambulante Ski, un persona hopi trankil semper cu su
bais, a pasa pa un miho bida. Hustamente banda di su
bicicleta cu un di su amigonan a trece p’e e mainta ey.
E tabata kere cu e por a subi e bicicleta ainda.
Segun AWEMainta por a compronde, Ski mes no
tabata kier ayudo y sigur no a pensa cu e lesion cu
el a ricibi, den su curpa di homber, lo no a afect’e
asina. Pero mirando e sangramento cu e tabatin dia di
e tiramento, probablemente el a haya un sangramento
interno.

Ademas, por a compronde tambe cu e auto shinishi cu
a pasa los bala, no tabata dirigi riba Ski, kende no sa
tin problema cu ningun hende. E bala aki tabata dirigi
pa un tal J., kende ta hang around den e area ey. Parce
cu Ski tabata pasando riba su bais y a pasa dilanti e
persona aki ora cu nan a los e tiro cu el a ricibi. Pues
Ski tabata na e “wrong place at the wrong time”.

Ski su nomber original ta Hubert y a fayece na e edad
di 50 aña, ela lanta den Sividivi y despues a muda pa
Klip.

Ski su hobby tabata core bais, Ski tabata e
prome campeon di Aruba den competencianan
intercontinental di BMX. Semper Ski tabata percura
pa e sali na prome lugar. Ski a yega di representa
Aruba den exterior. Ski tempo cu e tabata jong, e
tabata bay cu algun amigo di bario, e tempo ey banda
di e Surfside pa bula cu bais den santo blanco.

Despues ela cuminsa poco poco bay den e caminda
robes, pero maske e tabata den e mundo di droga,
semper e tabata keda bisa su amigonan cu droga ta
diabel y boso keda leu for di droga. Ski tabata ta
hopi aña pareha di e otro conocido adicto ambulante
Nathaly cu algun aña pasa a fayece. Ski a fayece unda
el a biba e ultimo añanan di su bida, riba caya y sin
molestia niun hende.
Condolencia na su amigonan cu Ski sosega na paz.