Page 38 - MIN JUS

Mervin Wyatt-Ras: No ta djis asina ta kita sosten di un ley cu
a wordo pasa caba den Parlamento

Tuesday, 29 November 2016 21:43
Comparti

Por a tuma nota di un miembor di Parlamento riba e amienda di Geregistreerd Partnerschap, a expresa
publicamente cu e ta bay retira su sosten pa e voto cu el a duna mas of menos 2 luna y mey pasa.

Mervin Wyatt-Ras, presidente di Parlamento, a expresa cu a trata e ley di codigo civil, cual ta un ley hopi
importante, un ley cu ta regla un cantidad di asunto pa nos pueblo. Por ehempel e cargamento di un
nomber, bo tin den e ley e posibilidad di herencia, e ta reglamenta tambe diferente asunto laboral,
mehoracion di posicion di nos trahadonan riba mercado. E ta confirma cierto asuntonan cu a wordo
regla y zwangerschapsverlof, cual e mes a yega di traha riba dje. Cambio den ley cu ta awor aki den
codigo civil cu a wordo drecha y poni eyden. Tambe e sosten pa nos muchanan, unda cu tin awor aki un
entidad cu lo bay ser encarga cu e asunto aki. Bo tin tambe tur diferente asunto unda ta regarda e voogdij
di mucha, e responsabilidad cu mayornan mester tin cu mayornan, educacion, ki tipo di straf por duna
un mucha. Hopi asunto hopi importante cu a wordo regla den e ley aki y durante esaki tambe a bin
padilanti e asunto di geregistreerd partnerschap, unda cu un dado momento un colega den Parlamento,
sra. Desiree de Sousa-Croes a bin cu un amienda, a presente un temporada y el a cana rond y a wordo
cambia na diferente ocasion, na un dado momento e diferente miembronan di Parlamento, lidernan di
fraccion, a bin hunto y nan a trece cambio y un dado momento esaki a wordo presenta tambe y carga
door di fraccion di MEP di sra Evelyn Wever-Croes, unda cu e ora tambe diferente miembro di fraccion a
vota pa cu esaki. Tin cu agrega cu den e ley aki tabata hopi di e miembornan di Parlamento den e
discusion, tabata cu ta vota segun bo mesun consenshi. Eynan bo ta haya cu tabata tin diferencia di
opinion den e fraccionnan cual no tabata nada. E tabata bay pa kico bo mes ta pensa over di esey.
Sr. Glenbert Croes tabata un di nan cu a duna su sosten. Den esey el a vocifera su opinion tambe pakico e
ta sostene e ley aki. Wyatt-Ras a haya un sorpresa cu e ta bay kita su sosten pa esaki, cual el a menciona
esey. Sin embargo e no ta kere cu ta djis asina por kita e sosten, pasobra ya caba e ley aki a wordo pasa.
El a wordo aproba den Parlamento unda cu e ley aki a carga mayoria. E ta un ley cu a wordo ya caba
sosteni. Awor si un miembro di Parlamento por cambia di opinion ora di sostene un ley y ora di vota cu
bo ta bisa pro y na e momento ey ta cambi'e, esey por. Sinembargo ora bo vota caba, bo votacion ta hopi
importante. Pesey ta yama Parlamento e Hoogste Orgaan. Pa loke ta trata e ley di BW, tin un
Invoerringsverordening cu tin na vigor tambe y cu e lo mester wordo trata den Parlamento como ley y
den e ley aki ta bin cambio den otro leynan tambe cu mester bin pa asina por logra pa e ley aki por bin na
vigor, pasobra e ta encera hopi. E ta un ley amplio, e ta carga hopi aspecto y tambe cambionan di otro ley
pesey mester bin den Parlamento. E ora Wyatt-Ras ta haya straño cu ta bin cambio den esey si en caso sr.
Croes dicidi e ta bay vota contra di e Invoerringsverordening. E ta bay mustra straño pasobra ya caba e
codigo civil mes, cu su amienda cu a wordo acepta, a wordo pasa caba. E ta aproba caba. Esey ta loke
Wyatt-Ras ta haya tiki raro pa su forma di reacciona cu el a trece padilanti.