Page 10 - RDA

Francis Oduber: Entrega di badge ta nifica algo grandi pa

trahadonan local di e industria petrolero

Sunday, 19 February 2017 17:51
Comparti

Den un ceremonia presencia pa Prome Minister Mike Eman diabierna ultimo, CITGO a haci entrega di e
prome 100 badgenan na trahadonan di contratistanan local cu a cuminsa traha riba rehabilitacion di e
compleho industrial di e refineria di Aruba.

Un proyecto cu tin un duracion di mas o menos 18 luna. Por spera cu den e periodo aki centenares di
cupo di trabou adicional ta bira disponibel.

Un di e companianan cu mas hopi aña tin operando den e refineria di Aruba ta Oduber Contractors NV,
cu mas di 60 aña di experiencia den e industria cu ta representa un pilar economico di nos pais. “Nos ta
eyden for di 1955. Ami mes a cuminsa na 1979 y nos ta bay un round mas sigur,” el a bisa na final di e
ceremonia.

E hecho cu a haci entrega di e prome badgenan, despues cu e refineria tabatin basta aña cera, tin un
nificacion grandi pa Francis Oduber. “E sentimentonan ta super. Pa Aruba e ta algo grandi, nos
trahadonan local specialisa di e sector local ta cuminsa haya trabou atrobe.” El a splica cu nan a cuminsa
cu un grupo di 12 trahado, pero esaki ta bay ta aumenta ya cu e trabou ta bira mas. Ademas, mientras cu
mas instalacion ta kedando cla, ta bay tin mester di mas hende pa traha. “E 12 trahadonan ta adicional di
loke nos tabatin caba. Nos nunca a sali for di e refineria. Nos a keda semper cu Valero, cu e parti di
transshipment, pero awo nos ta traha adicional pa CITGO, pa traha riba e unidadnan cu ta wordo
rehabilita.“ Segun el a sigui splica, Oduber Contractors a wordo asigna C5 Unit, cu ta uno basta grandi.
Nan a cuminsa caba pa drecha e unidad aki cu tin 5 aña para, haciendo trabou di mantencion riba e
trapinan, plataforma y structura.

Oduber a finalisa bisando cu aña 2017 a habri hopi bon pa Aruba. “Claro cu e ta un bon aña pa Aruba. E
asunto di e refineria aki ta un 'milestone', algo grandi pa Aruba. Mi por bisa cu e reanudacion di
operacion den e refineria ta e principio di cosnan grandi. Mi ta premira cu pa otro aña caba lo tin 1500
hende trahando sigur aki den. Esaki sigur ta algo grandi.”