Page 49 - MIN VOS 7 APRIL 2017

Lider di fraccion di AVP, Marlon Sneek: “Andin Bikker ta
presenta un vision desastroso pa loke ta pensionadonan”

Friday, 07 April 2017 08:27
Comparti

Un politico pa e ta sincero cu su pueblo, na prome luga mester ta sincero cu su mes y ta di lamenta cu
ainda tin politiconan cu ta trata di troce berdad, keriendo cu pueblo lo cay pa nan falta di sinceridad y
seriedad.

Lider di fraccion di AVP den Parlamento, sr Marlon Sneek ta mustra cu ta di lamenta e forma con Andin
Bikker lider di Democracia Real y candidato number 2 di partido POR, ta pretende cu e no ta compronde
Ingles y kier interpreta e reportahe inicial di IMF riba e situacion financiero economico di nos pais, den e
forma cu e ta kere e lo saca bentaha politico for di esaki. “Sin duda nos ta lamenta e hecho e forma con sr
Bikker ta trata di bolter un reportahe positivo y converti esaki den algo negativo pa mira si tin probecho
politico pa saca. E delegacion di IMF den su relato inicial ta mustra di ta sumamente satisfecho y na mes
momento impresiona, pa e forma serio con Gobierno di Aruba a bin ta atende cu e situacion economico
di nos pais. No solamente palabranan di elogio pero tambe di felicitacion pa e vision cu Gobierno diu
AVP a bin ta ehecutando pa di e forma aki percura pa reduci e deficit riba presupuesto y sigui crea un
maneho responsabel pa atende cu e situacion financiero di nos pais. Mientras cu IMF ta felicita y tin
palabra di elogio pa Gobierno di AVP pa e maneho cu ta ser hiba ultimo añanan, Bikker ta papia di un
reportahe devastador y tratando pa bende un vision politico cu si lo conduci na resultado desastroso
manera su vision pa loke ta edad di pensioen.

Nos por a ripara cu mescos cu e lider di MEP, Evelyne Wever Croes, Andin Bikker ta insisti cu nan lo
baha e edad di pensioen bek mientras cu na e momentonan aki tin un desaroyo serio na tanto Corsou
como e isla di Bonaire pa loke ta regarda e pensamento aki. Bin cu storianan sin sentido cu lo reduci e
cantidad di Minister di 9 pa 7 y kita cantidad di coordinador cu lo ta suficiente pa cubri e peso financiero
aki di su vision pa edad di pensioen, ta mustra no solamente cu Bikker no ta al tanto di kico esaki ta
nifica y con desastroso esaki lo resulta pa e pensionado. Na Corsou caba a tuma e decision pa esunnan cu
kier baha cu pensioen na edad di 60 aña por haci esaki pero aki ta bon pa mustra cu e mesun pensionado
aki lo bay atras cu casi 30% di su entrada caminda na luga di cobra 1080 pa luna, e lo ricibi un suma di
700 florin cu sigur no ta un suma cu cual un persona lo por pasa luna cune. Na e isla di Bonaire cu pa
colmo ta cay bou di Hulanda, sindicatonan ta preparando un welga general pa motibo cu aki tambe kier
reduci e edad di pensioen sin cu tin un forma pa sigura stabilidad di e fondo pa futuro caminda e fondo lo
bay haya su mes den problemanan hopi serio. Eynan tambe e pensionado lo ripara cu e lo bay cobra
menos cu inicialmente e lo a ricibi y ta puntonan cu Andin Bikker y Evelyne Wever Croes no ta splica
pueblo. Pa ilustra e ansha di morto den campaña politico mester menciona cu e lider di MEP ta prefera y
insisti pa bay contra su propio vision como hefe di departamento di impuesto den pasado, caminda el a
conseha Gobierno di MEP di Nel Oduber algun aña atras, pa aumenta edad di pensioen pa 65 aña como e
unico solucion adecuado pa salba e fondo aki.