Page 70 - HOH
P. 70
ORANJESTAD (AAN): Vocero di AZV, Solange Tchong a laga sa den entrevista cu
DIARIO cu pa por haci cambio di docter di cas mester acudi directamente na e docter di
cas nobo y eynan yena un formulario di cambio di docter.
E docter di cas mester percura pa manda e formulario pa AZV via email na e servicio na
e cliente pa asina AZV por atende e peticion di cambio aki, a señala.
Mester tambe informa bo mes si e docter di cas kier tuma bo como pashent y tambe pa
haya informacion con e praktijk di docter ta traha, orario, reglanan, etc.
Tchong a remarca cu tambe ta hopi importante pa e asegurado di AZV sa cu e servicio
ta tuma lugar completamente na oficina di docter di cas.
Awor a haci e posibilidad aki mas facil y cada asegurado por bay directamente na e
docter di cas di interes pa informa si nan por wordo tuma y sigui cu e proceso.
Solange Tchong a indica cu AZV tin alrededor di 48 docter di cas y ta bon pa comunidad
sa cu poco poco a cuminza reemplaza algun docter pasobra tin di nan a yega edad di
pension, cual ta stipula den e contracto.
AZV ta buscando docternan di cas nobo y pa cu esaki for di algun aña caba AZV a
apoya e proyecto y opleiding cu tin via Universidad di Amsterdam pa asina por percura
pa por keda reemplaza esnan cu ta birando grandi y cu na dado momento mester di
docternan di cas nobo, a duna di conoce.
E vocero di AZV a agrega cu pa loke ta cambio di botica a mantene e periodo di April y
October. Pa esaki e servicio ta bay igual unda cada persona por bay directamente na e
botica di nan escogencia.
Esaki ta bay ta valido entrante luna di October proximo.
El a enfatiza cu den luna di Maart y September por haci cambio di docter di cas y den
luna di April y October por haci cambio di botica.
https://www.diario.aw/2019/09/proceso-pa-haci-cambio-di-docter-di-cas-y-di-botica-a-bira-mas-facil/
