Page 52 - MIN VOS

Aruba Juniors ta reconoce contribucion di Minister Sevinger
na nan 85 aña di existencia

Tuesday, 14 February 2017 20:06
Comparti

Den fin di siman Aruba Juniors a celebra su di aniversario number 85, un trayectoria sigur remarcabel y di elogia.
Prome Minister Mike Eman a atende invitacion y durante su palabranan, el a recorda con e organisacion deportivo
ta forma parti di su recuerdonan di infancia ademas di felicita directiva y miembronan pa e papel importante cu ta
desempeña den nos comunidad.

Minister di Infrastructura, Benny Sevinger tabata entre esnan homenahea pa Aruba Juniors pa su contribucion
balioso na e club.
“85 no ta facil pa yega. Nos ta yam’e un club y instituto, pero e ta mas cu esey, e ta un centro di educacion. No tin un
hende den bario cu no ta relaciona cu e club di un forma of otro,” asina Minister Sevinger a declara na invitadonan
presente na e sede di e club.
Minister President Eman a relata na esnan presente con, como mucha, semper el a experiencia un ambiente hopi
grandi di deportista y miembronan dedica na yuda forma nos hubentud. “Asina Aruba Junior a bira un parti di e
bida den Playa Pabao, Companashi, Socotoro, Boerhavenstraat y asina crece pa bira un centro pa henter Aruba,”
Premier Eman a bisa, indicando cu, cu su 85 aña, Aruba Juniors ta demostra su derecho di existencia.
Minister Sevinger ta comparti e pensamento di Premier ora cu el a invita un y tur pa “celebra e trabou grandi cu e
diferente generacionnan a haci pa awe Aruba Juniors por ta e club ehemplar den nos comunidad y cu Creador duna e
inspiracion y guia pa continua cu e trabounan asina importante cu e club aki a haci semper pa Aruba.”