Page 20 - SJA

⨪

Aruba Bootcamp Foundation a perde caso di daño y

perhuicio entama contra Gobierno

Tuesday, 28 February 2017 18:19
Comparti

Corte den Prome Instancia a duna Gobierno di Aruba rason pa a interveni y paralisa e operacion di
"Aruba Bootcamp Foundation" dia 11 di juni 2015 na ex Club Bonaire na San Nicolas.

Despues di e accion ey, Gilbert Webb, e fundado y director di e Bootcamp a busca sosten legal di
abogadonan mr. John Zara y mr. Gabri de Hoogd y a entama un caso contra Gobierno y Ministerio
Publico, kendenan a conta cu defensa di e departamento huridico di Gobierno. Dia 15 di februari ultimo e
sentencia a cay y a publik'e dia 21 di februari 2017, den cual Corte den Prome Instancia a rechasa e
demanda di Gilbert Webb cu a acusa Gobierno di a comete un "onrechtmatige daad". T'asina cu desde
dia 13 di november 2014 a inscribi e Bootcamp na Camara di Comercio y mesora su tras Voogdijraad a
cuminsa haya keho con ta trata cu menornan di edad eyden, cu ta maltrata nan te heridanan! Na april
2015 Gobierno a skirbi riba su website cu Voogdijraad y Stichting Reclassering en Jeugdbescherming ta
desconseha mayornan pa laga nan yiu participa na e Bootcamp aki. Na juni 2015 a tende di hobennan cu
yega Eerste Hulp pa ricibi tratamento medico dor di kemaduranan ricibi na e Bootcamp, pasobra a benta
acido riba nan. Un siman despues, diahuebs dia 11 di juni 2015, un grupo forma pa Polis, Voogdijraad,
Bureau Leerplicht, DOW y Gezondheidsdienst a drenta e Bootcamp pa 6:00am pa un control di sorpresa.
A topa cu 16 mucha eyden y a hiba tur, bou ordo di "voorlopige toevertrouwing".

Voogdijraad a entrega e muchanan bek na nan mayornan y den dos caso a entrega na nan wela. DTI a
keur e edificio di Bootcamp af tambe. Eynan autoridadnan a topa cu un situacion inhumano, cu pan bieu
tur na beskem, galiña ta ontdooi den awa cu musca, cuminsa daña tur caminda, freezer paga cu carni
aden, productonan di come cu fecha cu a vence y asina por sigui menciona. Den nan demanda, e dos
abogadonan a pidi den nomber di Aruba Bootcamp Foundation, pa Gobierno paga nan "daño y
perhuicio" cu lo mester yega na dje ainda, basa riba tur locual nan a perde na entrada dor di e decision di
Gobierno pa drenta y paralisa nan operacion. Tambe kier pa Corte dicta cu e "inval" tabata ilegal. Di otro
banda Gobierno y Ministerio Publico a para riba cu nan accion tabata legal y cu motibo valido, cu
bienestar di e muchanan na prome luga. Den corto tempo Voogdijraad a haya asina tanto keho riba e
luga, incluyendo maltrato, ceramento den cachot, alimentacion limita y cu scarsedad di medidanan pa
promove higiena den e luga. Tambe cu e muchanan no tabata ricibi guia for di lidernan capacita, studia,
experencia of prepara pa e trabou. Despues di scucha e demanda di Aruba Bootcamp y di e contesta di
Gobierno, Hues mr. Y. Vanwersch a rechasa e demanda di Aruba Bootcamp y a dicta pa nan paga e
gastonan di e caso tambe.

http://www.24ora.com/index.php?option=com_content&view=article&id=119175:aruba-bootcamp-
foundation-a-perde-caso-di-dano-y-perhuicio-entama-contra-gobierno&catid=1:local&Itemid=5