Page 13 - SJA JAN 31

A logra pa trahadornan di ex Aura Casino continua den servicio cu tur derecho

Despues di reunionnan intensivo y extenso,

team negociador di Gobierno, lidera pa Minister di Labor, drs. Paul Croes, a logra yega na un acuerdo
satisfactorio pa tur partido, principalmente trahadornan di ex Aura Casino. Mayoria di e trahadornan ta
bay continua den ‘LIV’, e casino nobo cu ta habri diabierna proximo, permaneciendo cu nan
condicionnan di trabou y añanan di servicio. Minister Croes ta gradici tur cu a contribui na e resultado
positivo aki, specialmente consorcio local Island Gaming. Di e manera aki por bisa cu e episodio aki ta
practicamente tras di lomba, cu hopi les siña y investigacionnan pendiente.

Minister Croes ta gradici tambe e participacio balioso di Mediador di Gobierno Anselmo Pontilius,
representantenan di FTA, Rudy Geerman y tambe coleganan Prome Minister Mike Eman y Minister di
Finanzas Angel Bermudes. “Di e 44 trahador, 26 ta continua den servicio cu tur nan derecho cu tabatin y
nan aña di servicio. 15 a firma pa haya cuater luna di pago atrasa cu e otro compania no a cumpli. 3
trahador ta bayendo corte pa busca un pago mas grandi,” asina e titular di Labor a duna di conoce.

Lamentablemente no por a tuma e grupo completo ya cu e casino a reduci su espacio cu casi 60%. Ta
bon pa recorda cu tur trahador en cuestion a ricibi for di SVB nan cesantia, cual ta nan derecho adkiri pa
e añanan di trabou. Esaki a sosode na luna di mei/juni ultimo. Algun trahador a ricibi sumanan cu ta core
den 60 mil Florin y cu sigur a yuda pa yega te awo. Di e mesun grupo di trahador, algun a haya posicion
otro caminda caba.

Cu e lesnan cu a siña den e caso di ex Aura Casino, Ministerio di Labor y su departamentonan ta
tumando e pasonan necesario cu por evita su ripiticion den futuro y tambe yuda den e proceso di otro
casonan cu ta andando.

ATIA a reuni ku Minister di Labor sr. Paul Croes

Tambe a invita dos miembro dunador di trabouw grandi, esta Horacio Oduber Hospital y Pro-Tech pa
asina por ta parti di e reunion.Un di e topiconan hopi importante pa ATIA ta esun di labor. Ta pa e
motibo aki, ATIA a solicita un reunion cu Minister di Labor Paul Croes pa trata temanan cu tin di haber cu
labor. Segun Minister Croes a sera anja 2016 cu un porcentahe di 7.4 di desempleo y pa 2017 ta
proyecta cu lo baha esaki te na 5%. Nos a wordo informa cu di acuerdo cu un protocol firma
recientemente Directie Arbeid en Onderzoek lo presenta e cifranan laboral den colaboracion cu Banco
Central di Aruba y CBS desde e anja aki. E 2% menos di desempleo cu ta anticipa pa 2017 lo ta un efecto
directo di e rehabilitacion di e refineria. Pa prome biaha a firma un acuerdo formal, un labor regime, den
cual ta stipula cu CITGO mester cumpli cu e regla di 80/20. Esaki kiermen cu den 80% di e posicionan den
e compania mester wordo ocupa pa trahadornan local.