Page 7 - MIN JUS

Un abogado ta pasa door di un escrutinio continuo y

preparacion extenso

Publication: Thursday, 19 January 2017. Categoria: General
Pa garantiza cu asuntonan legal ta worde atendi di un forma diligente y responsabel
ORANJESTAAD (AAN)– Despues di a tuma nota di e sucedidonan recien encuanto individuonan cu ta worde
sospecha di tabata comete estafa haciendo nan mes pasa como abogado, Orden di Abogadonan di Aruba,
cumpliendo cu su meta di entre otro conserva asistencia legal adecua, a haya prudente pa elabora un poco riba e
importancia di pone bo asuntonan legal den man di un abogado legitimo.
Posesion di un titulo universitario di ley (mr of llm) ta un di e rekisitonan principal pa por worde admiti door di Corte
Comun di Husticia como abogado, mas esaki riba su mes no ta suficiente.
Pa por worde admiti como abogado un persona cu e titulo menciona mester
presenta un cantidad di documento dilanti Corte Comun di Husticia, manera entre otro un declaracion di conducta
duna door di Ministerio Publico, pa asina verifica cu e persona aki ta di comportacion impecable.
Adicionalmente tanto Procurador General como tambe Orden di Abogadonan di Aruba mester duna di conoce na
Corte Comun di Husticia di no tin ningun objeccion contra nombramento di e candidato en cuestion como abogado.
Asina cu tur rekisito worde cumpli cun’e, Corte Comun di Husticia ta planifica un audiencia den cual ta bay over na
huramentacion di e candidato. Akinan e ta
hura na Dios (of priminti den caso di no ta religioso) di lo eherce su trabao como
abogado na honor y conciencia.
Banda di esaki, un abogado tin cu eherce su ofishi bou di guia di un patron – kende mester ta un abogado cu amplio
experiencia – durante e prome 3 añanan di su carera. E patron tin e tarea di guia e abogado principiante pa asina e
siña conoce y haya experiencia den tur aspecto di abogacia. Ademas tur abogado tin e obligacion di tene nan mes
na e Ordenanza di Abogacia (Advocatenlandsverordening) y ta cay bou di e supervision di e Conseho di Supervision
di Abogacia (Raad van Toezicht).
E conseho aki, cu ta consisti di tanto huez como abogado, ta controla si un abogado ta atene su mes na e Reglanan
di Conducta y ta atende tambe cu eventual kehonan cu por tin riba e forma riba cual nan ta brinda nan
servicio.
Manera ta obvio for di lo antes menciona, un abogado ta mucho mas cu un hende cu conocemento di ley. Ta trata di
un persona cu ta pasa door di un escrutinio continuo y preparacion extenso pa asina garantiza cu bo asuntonan
legal ta worde atendi di un forma diligente y responsabel.
Pa verifica cu un abogado ta legitimo bo por acudi libremente na e website di Orden di Abogadonan di
Aruba, www.ova.aw, unda bo lo haya un lista di tur abogado cu actualmente ta admiti door di Corte Comun di
Husticia pa eherce e profesion di abogado, y tambe informacion tocante diferente otro aspecto di importancia riba
tereno legal.