Page 18 - MIN VOS

Balashi Premuim ta seya dos victoria contra Piratas
kendenan a caba di subi AA

Friday, 26 May 2017 09:25
Comparti

Campeonato HEINEKEN di Aruba Softball Bond dedica na dos baluarte Sra. Bertha Wolf Croes y
Eugenio “Tan” Helder a continua den gran forma. Den categoría AA masculino e equipo di Balashi
Premuim kende a caba di bautisa nan uniform nobo recientemente a sa di sali riba bon pia pa lokual ta
trata campeonato oficial di Aruba Softball Bond.

E hoben pitcher prometedor den desaroyo Giancarlos Gomez ta lansa un “No Hit No Run” contra Piratas
pa asina seya e promer victoria riba su nomber. E veterano Johannes “Poy” Flanegin kende a reforsa e
equipo Piratas cu a titula campeón 2016 y a subi pa AA a bay cas cu e derota. Balashi Premuim 4 careda,
8 hit, 1 error. Piratas 0 careda, 0 hit, 2 error. Mihor bateadornan pa Balashi Premuim a resulta Nathan
Berkel 3-3, Sando Geerman y Marc Danies ambos di 2-1. Den e di dos wega pa completa e doublé header
di anochi Piratas a mustra mucho mas mihor y a faha e hobennan di Balashi fuertísimo pero no por a bin
kla pa comberti esaki den un victoria. Balashi hungando bon bala ta seya nan di dos victoria di anochi.
Balashi Premuim 9 careda, 13 hit, 2 error. Piratas 7 careda, 7 hit, 2 error. Jorge Santana ta bay henter e
ruta y ta resulta pitcher ganador mientras Guillermo Montiel ta bay cas cu e derota.

Mihor bateadornan pa Balashi ta Nathan Berkel di 4-3 kende ta start campeonato “super hot” cu 6 hit
den 7 turno den promer dos weganan, Gerald werleman tambe a bay di 4-3. Juan Arango y Djurwin
Croes ambos di Balashi a conecta un cuadrangular. Pa Piratas a destaca na bate den causa perdi
Jonathan Perez 3-3 y Ramon Gonzalez di 2-1. Campeonato ta continua Diasabra atardi 5pm na Pos
Chiquito cu 2 wega femenino y ta continua diadomingo mainta 11am na Kudawecha cu 2 wega Femenino
mientras dialuna 29 di Mei pa 715pm na Pos Chiquito lo bay tin 2 wega valido den categoría A-Klas
masculino. Pues campeonato di Aruba Softball Bond den pleno desaroyo.