Page 10 - DIMP

Maduro: No a dicidi ainda si ta

introduci sugar tax na Aruba

Posted on 06/12/2019 11:20 am AST | Updated on 06/12/2019 11:24 am AST

ORANJESTAD – Gobierno no ta logra introduci e asina yama ‘sugar tax’ pa 1 di
juli 2019. Asina minister di Finanza Xiomara Maduro a confirma pa NoticiaCla. De
hecho, no ta sigur mes cu e sugar tax lo keda introduci como un di e impuestonan
‘vicioso’. Esaki pasobra simplemente no a tuma un decision final riba e asunto
segun Maduro. Cu e introduccion aki, e impuesto lo mester a genera 16 miyon florin
extra pa caha di gobierno. Algo cu awor no ta parse di ta algo sigur.

SUGAR TAX

E sugar tax ta un impuesto cu ta cay bou di e conotacion di ‘sin tax’, cu ta e termino pa
impuesto pa productonan visioso. E pakico ta importante pa e impuesto aki keda
introduci e aña aki ainda, ta pasobra el a keda presenta como un di e ‘medidanan’ di
gobierno pa genera placa extra, (16.7 miyon florin) cu awor ta na duda.
Consecuentemente, e mandatario a confirma pa NoticiaCla cu si no logra introduci sugar
tax, tin cu busca e suma di 16 miyon di un otro caminda. Unda, no ta conoci, y no ta
conoci si ta logra haci esaki pa 2019 ainda. Si no logra, e ta crea un otro buraco cu ya
caba e colegio di supervision financiero a remarca, mester keda soluciona.