Page 24 - awemainta 29may2017

24 AWEMainta Dialuna, 29 Mei 2017

Museo Arqueologico Nacional Aruba hunto cu Fundacion 1403

A ofrece un anochi sumamente Interesante,

informativo y inovativo na Biblioteca Nacional Aruba

DIAMARS ultimo, Museo Arqueologico a organisa un presentacion pa
publico en general na Biblioteca Nacional. Museo tin e honor di tin como
bishita. Melissa Price MA, kende ta un experto den arkeologia sub-acuatico cu
ta trahando na the Florida Bureau of Archaeological Research na Tallahassee,
Florida. Melissa, hunto cu su institucion, ta haci trabou di investigacion- y
peservacion di sitionan arkeologico bao awa na Florida.

Pero como tambe e ta un persona hopi interesa y facina cu Aruba el a uni
cu Museo Arqueologico p’asina ofrece su experticio pa studia y salvaguardia
nos sitionan arkeologico sub-acuatico na Aruba. E anochi aki publico a haya
un presentacion amplio tocante e trabaonan cu ta ser haci na Florida rib’e
tereno aki y tambe con lo por cuminsa uza e mesun tecnologianan pa asina
cuida nos sitionan arkeologico sub-acuatico.

Rib’e mesun anochi aki Museo Arqueolgico hunto cu Fundacion 1403 a
presenta e proyecto “Museum goes Tech”. Esaki ta den colaboracion cu
Brenchie’s lab y Nexus 1492 pa bin cu proyectonan unda e tecnologia
moderno lo ser usa pa investigacionnan y exavacionnan, pero tambe pa
presentacion di e obhetonan pa publico.
E anochi aki nos por a mira e ehempel di artefactonan cu a ser imprimi den
3D unda cu publico a sinti nan mes mas cerca di nos herencia arkeologico
cu Museo Arqueologico ta purba di cuida y preserva pa Aruba.

Tambe por a observa videonan di artefacto cu a ser gescan den 3D unda cu
por contempla e obhetonan aki di tur angulo. E duo dinamico di Brenchie’s
Lab, Christie Mettes y Tony Sevold, a duna un splicacion cortico tocante
e proyecto aki.

Prome cu e presentacionnan nos por a disfruta tambe di un artista hoben, esta
John Francis Jacobs, cu a sa di entretene e publico cu su musica di steelpan.

Un danki ta bay na Biblioteca Nacional Aruba pa host e anochi aki. Tambe
na tur e partners cu a yuda pa haci e anochi aki posibel manera UNOCA,
Nexus 1492, tambe na Joost di ADCTRA, Daniel di Carbay Real Estate
& construction, Lucky Electronics y na publico en general cu a asisti na e
anochi aki. Keda pendiente pa mas presentacion den e barionan di Aruba.