Page 33 - MIN VOS 26 NOV 2016

Den Volleyball Escolar organisa pa IBiSA: Colegio Bon Bini
ta titula Campeon

Friday, 25 November 2016 18:31

Comparti

Despues di un siman di weganan sumamente interesante den Centro Deportivo Betico Croes na Sta.
Cruz, e Campeonato di Volleyball Escolar organisa pa IBiSA a finalisa diahuebs atardi. E weganan di final
a inicia pa 2:30 p.m., unda cu den e prome wega ta subi cancha pa midi forsa pa e di tres y di cuater lugar
e muchanan di Scol Preparatorio Kudawecha y esnan di Prinses Amalia Basis School.

E wega aki a desaroya basta rapido y ta wordo gana pa Prinses Amalia Basis School, cu finalmente ta
logra e di tercer lugar den e campeonato. E muchanan contento ta ricibi nan medaya como ganador di e
di tres luga. Den e wega cu a sigui mesora despues, e muchanan di Cacique Macuarima School ta subi
cancha pa hunga yen di animo. E school aki ta conoci pa duna fuerte bataya den e deporte di volleyball.
Nan a hunga e wega pa titulo di campeon contra e muchanan di Colegio Bon Bini, cu e aña aki a sa di
duna tremendo bataya cu a clasifica nan pa final. E wega riba su mes a resulta den un intercambio di
punto bastante fuerte for di cuminsamento. Ambos scol a lucha te na final dunando otro hopi dolor di
cabes. Tabata bisto cu tur dos scol a traha duro pa logra e titulo di campeon desea. Na final ta e
muchanan di Colegio Bon Bini a celebra cu alegria e titulo di Campeon Nacional di Volleybal Escolar
2016-2017 di Enseñansa Basico, den e categoria B-mucha muhe. Mientras cu Cacique Macuarima School
ta keda na di dos lugar y ta ricibi nan medaya como tal. E muchanan di Colegio Bon Bini ta ricibi nan
medaya di prome lugar y tambe e Copa Rotativo di Campeon di Volleyball Escolar mucha muhe.

Tanto e team di volleyball di Cacique Macuarima School cu ta sub-campeon y e team di Colegio Bon Bini
como campeon, ta bay representa Aruba den e ‘Weganan Interinsular 2017’ den e deporte di volleyball.
Ora un disciplina di deporte den e ‘Weganan Interinsular’ ta tuma luga na Aruba mes como isla
organisador, e prome y e di dos luga di e campeonato escolar ta haya e oportunidad pa representa nos
isla. Den e caso aki e ‘Weganan Interinsular 2017’ ta tuma luga dianan 6, 7, 8 y 9 di april 2017. IBiSA ta
felicita tur scol cu a participa, specialmente e ganadornan y tambe tur mayor y maestro pa nan
contribucion, apoyo y sosten na nan scol durante e campeonato. Pa un reportahe amplio di potret di tur
wega, por subi riba Facebook di IBiSA.