Page 37 - HOH

Segun e Ley di Calidad di Cuido e ta obligatorio pa tur dunado di cuido tin un ‘klachtenregeling’, es
decir un maneho di keho. Esaki ta nifica cu tur pashent lo mester por tin e oportunidad pa entrega un
keho contra un dunado di cuido of practica si e no ta satisfecho cu e servicio cu a wordo ricibi. Prome

cu e introduccion di e Ley di Calidad di Cuido, un maneho di keho no tabata obligatorio y pa e
motibo aki e dunadonan di cuido no tabata obliga di trata y resolve kehonan di nan pashent.
Sinembargo, entrante 1 di januari 2019 a bin cambio den esaki y Inspectie Volksgezondheid Aruba

(IVA) ya ta controlando desde januari 2019 si en berdad e dunadonan di cuido tin un maneho di keho
cu ta funciona manera ta stipula den ley

E meta di e maneho di keho aki no ta solamente pa e pashent tin e oportunidad pa entrega un keho si

e no ta satisfecho cu e servicio duna door di un dunado di cuido. Pero tambe e maneho di keho ta
duna oportunidad na e dunado di cuido pa controla e calidad di cuido cu e ta duna y pa e keda
mehora e cuido y servicio.

Tin diferente rekisitonan cu e maneho di keho mester cumpli cun’e. Entre otro, cu mester ta bisto y
claramente describi con un pashent por entrega e keho. Tambe cu un pashent mester por entrega e
keho por escrito door di yena un formulario cerca e dunado di cuido y cu e keho mester wordo

resolvi dentro di 6 siman pa e dunado di cuido (solamente den casonan particular por haya extension
di maximo 4 siman mas). Un otro rekisito importante ta cu mester tin un ‘klachtencommissie’. Esaki
ta un comision cu lo intermedia den casonan cu un pashent y e dunado di cuido no por yega na un

acuerdo of cu e pashent no ta satisfecho cu e manera con su keho a wordo trata. Pues, den e casonan
ey, e pashent por entrega su keho na e comision di keho cu lo tuma e keho over y haci su mesun
investigacion. Ta importante pa remarca cu IVA lo keda monitoria si e kehonan ta wordo trata door

di e dunadonan di cuido. Esey kiermen cu semper pashentnan por keda acudi cerca IVA pa pregunta
of asistencia.

Desde september 2017, tur dunado di cuido a wordo notifica y recorda pa medio di carta, email y

reunionnan cu nan mester tin un maneho di keho. E dunadonan di cuido a ricibi tur e rekisitonan por
escrito y a wordo pidi pa controla si nan maneho di keho ta cumpli cu e rekisitonan aki. Si acaso
dunadonan di cuido no ta sigur ainda si nan maneho di keho ta cumpli cu tur e rekisitonan, nan por

manda nan documentonan digital pa un control final door di IVA via: info@iva.aw. E control aki no
ta obligatorio, pero ta un ayudo extra pa e dunado di cuido.