Page 16 - KPA JAN 31

3 hours ago 0 27 Views
Un recomendacion di Señora Tatiana Eman-Mallarino, esaki den cuadro di e cantidad grandi di
atraconan. Sra Tatiana ta conoci como un di esnan den front, di e marcha contra criminalidad cu
a tuma luga aña pasa.
Aki mi ta haci algun recomendacion:
Pa cas:
– Bo cas mester ta semper na lock. Tur bentana y porta bon cera.
– Ora bo sali, no laga e yabi atras y scond’e bou di piedra, mailbox of potch’i mata.
– Si bo tin alarma, lag’e ta bon conecta; si bo no tin, cuminsa pensa ariba inverti den un.
– Evita di ta predecibel. Ladronan ta vigila nan victimanan. Purba yega cas ariba diferente ora y
yega for di diferente caminda.
– No comenta ariba Facebook of cu hopi hende ora lo bo ta cu vakantie y e cas lo keda bashi.
– Si bo tin camara, laga nan ta visibel, no sconde nan.
– No laga obheto di valor/placa na cas, si toch bo no tin otro caminda pa warda nan; purba pone
tur cos hunto den un safe BON scondi. No laga nan verspreid/visibel rond di cas
– Si bo ta bay sali, laga e cas atras di un manera cu ta duna e impression cu tin hende paden, dus
luz, TV of radio cendi, etc.
– No habri porta pa hende cu bo no conoce.
– Tene bo cura bon ilumina anochi y marduga.
– Un cacho semper ta yuda, pero esunan chikito ta fantastico, ya cu nan ta blaf sin stop.
– No drumi cu bentana habri.
– Drumi cu cortina cera pa niun hende por wak paden.
– Si bo ta bay biaha, laga paña colga ariba cabuya pa duna e impresion cu si tin hende na cas.
– Ora di yega y sali wak rond bon y sea alerta di cualkier persona den proximidad.
– Saca potret di cualkier persona of auto straño den bo bario.
– Cera compromiso cu bo bisiñanan pa yuda otro. Traha un Whatsapp chat group y reporta
cualkier movecion straño den cercania, UNION TA HACI FORSA.
Ariba caya:
– Sea alerta, no cana distrai; mucho menos cu cellular den man ta chat of papia. Tur bo
sentidonan mester ta alerta.
– No lanta placa bo so, ni durante e oranan di anochi.
– No cana cu articulonan ostentoso ariba caya.
– Ora bo core auto, wak si no tin hende ta sigui bo.
– Cana cu bo tas cera y bon wanta. Hende homber no carga e cartera den e saco patras di e
carson, pero dilanti.
– No habri bo cartera ni conta placa ariba caya.
– Purba cana cu no mucho cash.
E recomendacionan aki no ta pa drenta den panico, pero pa nos tur ta mas atento y pa nos no
sigui duna e delincuentenan e oportunidad pa caba cu nos paz y trankilidad.

Consehonan di Tatiana Eman-Mallarino pa bienestar di nos tur!