Page 7 - AVB
P. 7
La Fama a subi tereno cu Guylaine Geerman den gol, e liña defensivo a wordo forma pa
Francien de Windt, Algesha Sweetnam, Rosa Montiel Escobar y Avril Maldonado,
mientras cu e medio campo a wordo forma pa Nicole Garcia, Jeceline Boekhoudt,
Edriana Molina y Shaquira Rodriguez.
E liña ofensivo di La Fama a wordo forma pa Yenifer Huntington y Shadira Croes.
For di prome pitaso di referee e ekipo di La Fama a busca pa tuma iniciativa den e wega
caminda ya na di dos minuut y 30 seconde di e wega, e hoben delantero Shadira a
avansa riba e banda drechi y pa sorpresa di tur hende, e centro ta pasa ovber di cabes
di e porterio di Nacional y cay den net pa duna e ekipo di Savaneta bentaha di 1-0.
La Fama a sigui domina e accionnan den e prome tempo pa gran mayoria y tabata te
na di 21 minuut cu Nacional a haci su prome atake serio riba e gol di La Fama y tambe
a busca oportunidad di empata e wega cu dos tiro liber.
E gol di empate ta bin cay sorpresivamente ora c’un centro for di e banda drechi ta bay
halto y pica net dilanti di portero Guylaine pa despues pasa over di su cabes y cay den
net pa e wega empata na 1-1 y cu cual anotacion e prome tempo tambe a termina.
CAMBIO GRANDI
Den di dos tempo Deportibo Nacional tabatin su miho momento den e minuutnan inicial
pero for di 51 minuut bay ariba, La Fama a pasa pa domina e medio campo y den e
parti defensivo tabata hopi strak mes y no a permiti Nacional haci mucho cos.
Apesar di e dominio La Fama no por a yega na e gol di bay ariba y dura te na di 61
minuut cu e e volante Nicole Garcia ta deposita e bala den net despues di otro atake di
su ekipo pa asina La Fama saca bentaha di 2-1.
E ekipo di Savaneta a sigui cu su dominio riba Nacional y na di 67 minuut Yenifer
Huntington ta cobra un tiro liber cu portero di Nacional no por a domina y e bala ta
rebota su dilanti y aki tabata Shadira Croes kende ta reacciona rapidamente y ta
deposita e bala den net pa duna La Fama bentaha di 3-1.
