Page 38 - awm02may2017

38 AWEMainta Diamars, 2 Mei 2017

Riba Dia di Trabou

Prome Minister Eman a traha schouder cu schouder

cu empleadonan di hotel

YA for di oranan tempran di mainta Prome Minister Eman a yega
na e hotel Divi Tamarijn pa duna un man na e empleadonan cu
ta trahando riba Dia di Trabou.
Un gesto cu a cay den masha hopi bon tera. Un iniciativa cu a
haya hopi aprecio.
Di e manager di e hotel, di e empleadonan y sigur tambe di e
turistanan cu a sinti nan mes honra di a wordo sirbi dor di Prome
Minister di pais Aruba.
Asina nan desayuno a smaak mucho mas miho, nan cama drecha
dushi pa drumi, nan cocktail tabata exkisito y nan pizza sabroso.

Freddy, F&B manager di hotel Divi Tamarijn a bisa di ta contento
cu presencia di Prome Minister di Aruba y con el a duna un man
na e trahadornan.
“Esaki ta algo admirabel di Prome Minister. Aunke cu e ta traha
hopi duro caba pa Aruba, nos a pone traha duro tambe aki nan.
Bon cu el a experencia e trabou cu nos ta haci aki.
El a pasa den nos diferente departamentonan pa yuda y el a cushina
pa nos turistanan.
Tabata algo hopi bon, no solamemte pa e trahadornan, pero pa e
turistanan tambe.
E turistanan tabata ‘full excited’ y tabata comenta cu loke Premier
a haci ta masha admirabel”, el a comenta.

E F&B manager a splica cu ningun hende tabata na altura cu Prome
Minister Eman lo tabata na hotel e mainta ey.
“Awe mainta nos a bisa nan cu dor cu ta Dia di Trabou nos ta trece
un persona extra pa yuda nan cuatro ora largo. Nos no a bisa ta
ken. Ora cu Prome Minister a cana drenta tur hende a keda masha
emociona. Nan a yud’e y el a yuda nan”, el a sigui bisa.

Freddy a keda impresiona con cos a cana den e hotel. “E iniciativa
ta algo tremendo y otro aña Prome Minister Eman mag di bin bek.”
Despues Freddy a duna un palabra di estimulo na su trahadornan.
“Boso semper ta haci un bon trabou y sigui asina. Hopi danki pa
semper t’ey y cumpli cu boso trabou.”

Prome Minister Eman a traha den e restaurant pa sirbi desayuno,
a yuda den roomservice unda el a drecha e camanan, a traha como
bartender y a sirbi pizza na e clientele di e hotel.
Un dia fructifero cu a wordo hopi aprecia.