Page 33 - MIN ARENDS_Neat

Mike Eman gradiciendo participantenan di 1000voz: Awe
boso a demostra un biaha mas cu nos ta realmente e partido
di pueblo

Sunday, 07 May 2017 19:38
Comparti

Como parti di e programa di e evento 1000voz cu Fundacion Digna Lacle Herrera y Fundacion dr. Mito
Croes a tene diadomingo mainta, organisadornan a invita lider di partido AVP Mike Eman
pa hiba palabra di danki net prome cu clausura. Aki e lider politico a gradici e grupo enorme di
participantenan cu a reuni den ballroom di Hilton Hotel, pa mantene e balor den e partido su nomber,
pero tambe a sigura nan cu nan a skirbi historia y cu nan deseonan lo pasa for di papel pa realidad; sea
bou di su guia of di esun di e proximo generacion.
Eman a splica cu e y su coleganan a cana y bishita barionan pa haya vision pa goberna e pais. Den
gobernacion no a asumi ni 12 ni 13 asiento cual ya caba ta un mandato, pero a introduci Dialogo Social, a
introduci ‘Town Hall Meetings’ y a introduci bishita den bario practicamente tur siman pa keda den
consulta cu pueblo; pa keda haya e direccion for di nos comunidad di kico ta e siguiente paso y kico ta e
siguiente prioridad.
“Awe nos a eleva e nivel di participacion di comunidad den determina e prioridadnan pa futuro na otro
nivel, uno nunca bisto sigur no den Caribe ni tampoco den Latinoamerica, unda programa di un partido
ta wordo traha a base di un consulta asina amplio. Un aplauso pa boso tur pa e participacion aki,” asina
lider di partido AVP a expresa.
Cu e ideanan aki AVP ta bay traha e programa di partido y cu trabou duro y cu debocion, e programa di
partido ey ta bira e siguiente programa di e siguiente gobernacion. Eman: “Ideanan cu mi a wak riba
mesa awe ta pa tres pa cuater of cinco gobernacion cu ta bin. Te unda cu Dios duna mi energia y boso
duna mi e confiansa y cu mi por haci un diferencia, lo mi tey pa cana cu boso, pero nos ta prepara e
siguiente generacion pa e trabou.”

E fundacionnan encarga cu 1000voz ta bay percura pa un plataforma caminda lo pone e ideanan cu a
bini hunto pa asina e por ta accesibel pa tur hende wak unda prioridad a wordo poni. Lider di partido a
gradici esnan presente pa nan ideanan y pa duna e diadomingo cu nan por tabata na cas, den un
momento di recreo of loke ta haci regularmente cu famia, pero a duna e tempo na pais y pueblo. “Awe
boso a demostra un biaha mas cu nos ta realmente e partido di pueblo. Dios bendiciona boso, ban sigui
traha pa futuro di e pais,” Eman a finalisa bisando.