Page 14 - CITGO
P. 14
Rene Herde: Fraccion di AVP Reunion cu camara di
comercio Awe tabata fructifero
Wednesday, 15 February 2017 17:38
Comparti
Un reunion planea for di comienso di aña entre e fraccion di AVP y directiva di Camara di Comercio a
tuma luga ayera mainta den sala di comision di Parlamento. E agenda di e reunion a inclui temanan
manera stimulacion di y incentivonan pa empresarionan hoben, seguridad di tiendanan chikito, CITGO,
renobacion di ROPV, diversificacion di economia y medio ambiente, "micro financing", e situacion di
tiendanan den Caya Grandi. Como cu e combersacion tabata asina bon y no a logra trata tur e temanan
riba e agenda, a palabra pa reuni a corto plazo atrobe.
Di banda di e fraccion di AVP tin e deseo di bay mas leu cu djis papia cu otro. E fraccion di AVP ta
convenci cu Camara di Comercio ta un fuente di informacion riba comercio na Aruba, cu por y mester
wordo usa mas pa yuda den desaroyo di comercio y economia na Aruba. E fraccion di AVP ta haya cu e
combersacionnan aki mester conduci na accionnan concreto na interes general. Vocero di e fraccion di
AVP a declara cu e reunion tabata masha fructifero. E reunion a bira un dialogo y intercambio habri di
informacion y opinion riba un cantidad grandi di tema cu for di dos siman pasa ya caba tabata conoci
serca e dos organisacionnan. E combersacion tabata asina bon cu a palabra entre otro pa bolbe reuni a
corto plazo. Mientrastanto lo intercambia di informacion cu den reunion a pidi di otro.
