Page 5 - AVB

Inversion historico den material di futbol pa tur

club di Aruba

November 3, 2018

AVB trahando hunto cu FIFA pa engrandece futbol na Aruba

ORANJESTAD, Aruba – E aña aki pa Arubaanse Voetbal Bond (AVB) tin un aña historico, partiendo hopi
material na clubnan di futbol afilia na e organisacion. E materialnan regala pa AVB a varia dependiendo di e
cantidad di division cu cada club tin. Presidente di AVB, ing. Richard Dijkhoff, tabata feliz cu un biaha mas di
por a traha hunto cu FIFA pa yuda clubnan sigui engrandece futbol.

Por exigi clubnan miembro di AVB pa desaroya futbol, pero sin material e ta bira dificil. E federacion mester a
convence representantenan di FIFA, cu constantemente tabata na Aruba, pa por a yega na materialnan. P’e

directiva e evento tabata special unda a parti material na clubnan. E proyecto a tuma su tempo di cual a inicia 2
aña pasa y awo a bira un realidad, asina Richard Dijkhoff a expresa. Den e sistema nobo di traha cu
CONCACAF y FIFA, cada peticion mester bin man den man cu un plan di ehecucion, midiendo adelanta con
positivo e proyecto lo afecta futbol.

FIFA mester a compronde prome con AVB ta trahando y na momento cu nan mes a constata cu proyectonan ta
bayendo den bon direccion y cu ta haciendo locual a bisa, cu mesora nan mes a coopera mas lihe cu
proyectonan di desaroyo pa AVB.

Den e lunanan nos dilanti AVB lo ta ocupa cu diferente proyecto y e siguiente paso ta cu tur coach, di tur
division di e organisacionnan, lo ricibi un compensacion pa nan trabou. E federacion lo duna nan e
compensacion y ta haci esaki pasobra ta garantisa continuacion.

Presidente di AVB a expresa cu e materialnan aki ta un estimulo na e dirigentenan, pa duna nan e forsa pa por
sigui cu e bon trabou haci. AVB y e clubnan a firma un acuerdo, cu ta indica e condicionnan cu e clubnan
mester asumi na dje pa por ricibi y keda cu e materialnan. Durante e proximo dianan AVB lo percura pa e

clubnan ricibi e materialnan di futbol.

E proyecto di AVB ta hopi bunita mes, esta pa duna clubnan e materialnan necesario, asina Rossy Marchena,
secretario di SV Dakota a expresa. Material di deporte ta hopi caro, e ta un di e gastonan mas caro di e clubnan
durante aña. E materialnan duna, esta net, gol, bala, pion, etc., ta loke tur club mester pa por practica futbol.