Page 55 - DE MEZA_Neat

Posted on 05/1/2017 10:59 pm AST | Updated on 05/1/2017 11:13 pm AST

BUCARAMANGA – Despues cu ela biaha cu urgencia pa Bucaramanga, Colombia
recientemente pa problema cu curason, awe nochi a drenta noticia tristo cu director
di Directie Scheepvaart a fayece a consecuencia di complicacion cu ela haya durante
su estadia na Colombia. E mester a bay opera, pero no ta conoci si ta durante e
operacion ela haya complicacion, of ta despues di operacion y a bin fayece.
Informacion cu NoticiaCla.com tin, ta cu for di su baymento pa Colombia, tabata
teme pa lo peor mirando e situacion, pero no a perde speransa y tabata spera un
mehoracion. Pero destino tabata otro.

NOTICIA A SHOCK TUR HENDE

Asina cu e noticia a plama, hendenan a cuminsa reacciona den un forma di shock. For di
su coleganan di trabou, te na ex amigonan di scol, tur no por a kere e noticia. De Coteau
tabata un persona sumamente stima den comunidad, for di tempo como hoben den
baseball. Despues ela drenta politica y yuda varios politico, entre nan ex minister Otmar
Oduber, cu campaña. “Mi a perde mi amigo, ruman. Mi ruman a bay lagami” Oduber a
bisa awe nochi ora cu ela tende e noticia. "Mi ta kibra. Un di mi conseheronan principal".
Otronan cu a bay scol cu ne, a raporta cu ‘nos a perde nos schoolgenoot’. Forsa na
famianan di Carlyle y cu e por sosega na paz.