Page 61 - ATA

Parlamentario Daphne Lejuez:

ORANJESTAD (AAN) – Parlamentario di fraccion di MEP, Daphne Lejuez, a elabora
tocante e conferencia di prensa reciente di e Comerciantenan Uni, cual e tambe a

scucha y e ta haya cu via dialogo mester yega na un solucion entre gobierno y gremio
comercial.

Manera ta conoci e representantenan cu a duna e conferencia na KvK, a expresa tur

nan inkietudnan tocante e efectonan cu medidanan tuma pa gobierno ta genera pa nan
negoshi. Entre otro, nan ta pidi gobierno pa e BBO aparece riba recibo, ya cu esaki ta
trece efectonan pa nan negoshi, tanto den e concurencia den e mercado local como
internacional.

E Parlamentario Lejuez a señala cu el a scucha tur gremio y a purba di papia cu
gobierno pa scucha nan y yega ma un compromiso, pero ainda esaki no a logra
completamente, y esey ta motibo tambe cu dia 20 di Juni ultimo el a entrega un ley di

iniciativa pa draai bek e ley di BBO, na spera di un solucion y pa mira mas claridad riba
kico e di dos tanda di e reforma fiscal ta bay ta, pasobra pa e gremio comercial ta
masha importante pa nan sa, pa nan por planea pa haci inversion, pa tuma mas hende
na trabao, pa haci nan mercadeo, etc.

Parlamentario Lejuez a señala cu e incertidumbre cu ta reina entre e comerciantenan y,
e ta kere cu, na e momentonan aki locual mester tuma lugar ta mas dialogo entre
gobierno y comercio, pa yega na un solucion.

E parlamentario por a lesa den corant cu Minister di Economia y Finanzas lo a sinta ya
caba cu Camara di Comercio y lo bay den un sesion cu e stakeholders, y e ta sinti cu
nan ta moviendo den e direccion corecto y cu, eventualmente, lo yega na un areglo.

Parlamentario Lejuez a señala cu e ta kere si, cu mester yega na un compromiso y
trece claridad pa e comerciante tambe sa kico ta bay haci, pasobra e no por ta
cambiando su prijs cada bez y cu cada rato ta bin otro parti di e reforma, unda esnan

cu ta sufri na final di dia ta e comerciante, esnan cu ta traha pe, y tambe e consumidor
cu tin cu paga e prijs.