Page 75 - MIN VOS_Neat
P. 75
editor 2 MINS
POST VIEWS: 96
POSTED ON MAY 20, 2017, 4:06 PM
ORANJESTAD,Aruba
Ta conoci cu nos yuinan di tera cu studia medicina den region lamentablemente ta enfrenta hopi
obstaculo pa haya debido reconocimento di nan diploma na Aruba. Esaki no obstante e hecho cu
propio pais Aruba a duna nan studielening, y cu tur dia AZV ta manda patientnan pa tratamento den
region. Durante un bishita di cortesia cerca e Ministro di Salubridad di Costa Rica, Dr. Fernando
Llorca Castro, mr. Andin Bikker a toca e tema di reconocimento di diploma di nos yuinan di tera cu a
studia medicina na Costa Rica. E Minister a indica cu e tema tin su atencion y ta dispuesto pa
intermedia via canalnan diplomatico pa yega na un solucion pa e diplomanan di nos studiantenan, cu
a caba di studia of cu ta studiando na Costa Rica, wordo debidamente respeta y reconoci na Aruba.
Costa Rica tin un nivel halto di cuido medico: ta haci por ehempel transplante di cornea den
cooperacion cu institutonan di Tampa, Florida, na nivel comparabel cu e miho institutonan di
enfermedadnan di bista, manera por ehempel Bascom Palmer Eye Institute (caminda cu por cierto
AZV sa manda patient). Actualmente SVB di nos hermana isla Corsow ta mandando patientnan pa
transplante di cornea pa Costa Rica. Tambe ta un hecho cu Costa Rica ta atrae turismo medico for di
rond mundo, incluyendo paisnan manera Merca y Canada, pa entre otro intervencion cardiovascular
y checkup ejecutivo. Na Costa Rica actualmente tambe ta haci testnan clinico pa registracion di
medicina nobo pa entre otro cancer. Dus Costa Rica conoce un nivel di cuido y medicina sumamente
avansa y ta ironico cu na Aruba gobiernonan di partidonan tradicional di zowel color berde y geel a
balota e diplomanan di nos yuinan di tera cu a studia na Costa Rica. Plataforma di union POR e Forsa
Nobo lo trece cambio den e situacion ey pronto ja cu no mester lubida cu Aruba y Reino Hulandes tin
pa observa entre otro un tratado pa reconoce diplomanan den region, esta e tratado di United Nations
acorda na Mexico na 1974.
