Page 108 - KPA

Presidente di Parlamento: Justicia mester haci mas pa
garantisa trankilidad den nos hogarnan

Monday, 06 February 2017 20:33
Comparti

Den un bijeenkomst cu a dura mas o menos 5 ora Parlamentarionan di diferente fraccion a haci nan
preguntanan critico na minister di Justicia mr drs. Arthur Dowers encuanto criminalidad na Aruba. E
reunion aki a ser pidi dor di fraccion di AVP basa ariba e diferente atraconan di ultimo simannan cu e
meta pa haya un update di informacion, accionnan y cifranan di combatimento di criminalidad.

Minister a trece padilanti cu no ta di awor criminalidad ta pidi atencion. El a menciona un rapport ya
caba di anja 2007. Durante ultimo dianan criminalidad a haya un diferente angulo. E forma con
atraconan ta tuma lugar a cambia. Tin 14 caso registra. E casonan ta diferente na anjanan anterior. Awor
tin mas atraco na casnan individual envez di negoshinan/empresanan, loke ta ser horta tin menos valor
en comparacion cu anjanan anterior, ta trata di atraconan di impulso, tin diferente constelacion di
atracadornan, mobilidad tambe ta diferente etc. Pues ta rekeri otro forma di atende cu e situacion.
Locual ta ser nota cu ora e atracador ta stranhero nan ta ser yuda dor di Arubiano mes. Segun Wyatt-Ras
no por ta asina cu nos hendenan den nan cas no ta sinti na mes insigur. Esey ta un preocupacion pa
Parlamento. En total 17 Parlamentario incluyendo Wyatt-Ras a haci pregunta y dicho preguntanan a ser
contesta dor di minister cu a presenta den parlamento cu diferente hefenan di departamento manera di
cuerpo policial, KIA, Veiligheidsdienst y conseheronan di minister. Sigur tin un cantidad di punto pa
traha ariba dje. Nos pueblo kier mira cu polis ta presente tur caminda. Ta necesario cu diferente
departamento y ministerio ta traha hunto pa ataka a problematica y cu banda di e trabou sec di polis tin
control na frontera, cu tin suficiente polis, cu por haci uzo di camera, drones y tur otro instrumentonan
digital tambe pa por registra y controla individuonan tambe ora nan drenta y sali for di Aruba. Alavez tin
cu evalua cierto leynan manera e.o. LTU, wapenvergunning y strafvordering . Pues banda di
intervencionannan ta necesario mas informacion pa nos hendenan por ta mas prepara pa cualkier
eventualidad. Preveni ta mihor cu lamenta. Wyatt-Ras ta kere cu alavez tin cu traha mas dirigi tambe
ariba nos hubentud den problema paso nan ta vulnerable pa cai den criminalidad. E Centro
Orthopedagogico mester ser amplia pa atende cu e hobennan mas problematico y tin cu keda sostene
buro Reclassering. Wyatt- Ras ta conclui cu aunke cu segun minister hopi ta ser haci pa domina
criminalidad y cu cuerpo policial ta haciendo un bon trabou tog tin mas cu tin cu wordo haci pa garantisa
trankilidad den nos comunidad.