Page 92 - MIN JUS

Rene Herde: Pero laga trabou di combati criminalidad den
man di polis

Tuesday, 31 January 2017 19:51
Comparti

E atraco y menasanan di ultimo siman aki tin hopi hende preocupa y spanta. Esey ta mas cu
comprendibel. Niun hende kier pasa den loke e famianan na cas y negoshinan cu a wordo atraca a pasa
aden. E atraconan ta causa daño material, sicologico y ta forsa hende pa cambia nan forma di biba.

E efecto y consecuencianan di criminalidad ta simpelmente teribel pa tur hende cu pasa aden y pa henter
nos pais! Tur nos autoridadnan concerni, polis, duane, immigracion, etc. ta trahando mas largo, mas
intensivo y mas den coordinacion cu otro pa gara, sera y castiga e malechornan. Nos, e comunidad,
mester yuda nan den esaki. Hunto nos ta wak y tende hopi mas na tur momento di dia cu polis so. Nos
tur tin telefon pa saca potret y yama polis ora nos tende of wak algo sospechoso. Hopi ciudadano ta haci
esaki den un forma corecto, cu hopi cuidow y den un forma responsabel. Esey ta yuda hopi!
Mientrastanto e comunicaicon via FaceBook y Whatsapp a mustra cu e medionan social aki por sirbo nos
bon si nos usanan bon, enbez di bruha tera y parti redashi. Esaki ta e cosnan cu un comunidad
responsabel cu ta cuida otro ta haci. TUMA LEY DEN PROPIO MAN Loke nos NO mester haci ta loke
algun hende ta haciendo cu intencion pa sembra panico, miedo, rabia y frustracion den comunidad. Tin
un grupo di hende cu ta traha y parti informacion totalmente eroneo; nan ta saca potret y circula
esakinan sin haci niun envestigacion; tin hende cu ta instiga hende pa arma nan mes cu palo, machete y
scopet. Nan ta sugeri pa tuma ley den propio man, creando e impresion robez cu esey ta e miho forma di
proteha bo mes. E resultado di esaki ta cu nan ta crea panico, lanta miedo y frustracion den hende. Nan
ta haci cu en berdad tin hende cu ta bay busca arma pa proteha nan mes. Pero enbez di proteha nan mes,
nan ta pone nan mes y nan famia den peliger.

E ta causa cu hende ta bay biba sera y cu miedo den nos propio pais! E comportacion aki ta irresponsabel
y pio ora e ta bin di hende cu mester sa hopi miho. Hende cu sa cu mester educa otro y hende cu
responsabilidad pa asuntonan importante den nos comunidad. Pasobra no tin peliger mas grandi pa nan
mes, cu hende sin experiencia cu arma den nan man. No tin nada pio pa un comunidad cu ora hende ta
tuma ley den propio man! E ora tur hende ta core peliger. Ta pesey un comundad responsabel cu ta cuida
su hendenan ta laga su cuerponan special di polis, imigracion, duane, seguridad nacional, etc. atende cu
asuntonan di criminalidad. E organisacionnan specialisa aki ta prepara y ekipa pa atende cu
criminalidad. Nos como comunidad a duna nan e responsabilidad pa haci e trabou aki pa nos. Nos ta
condena absolutamente y incondicionalmente tur forma di crimen. Sigur e crimennan cometi contra di
hende inocente den paz di nan cas y luga di trabou. E atraconan ta terribel y nos mester sigui haci
delaster un cos pa stop y preveni esakinan! Ban yuda polis y no stroba polis. Ban usa Facebook y
Whatsapp pa yuda polis y no parti informacion robez of sembra miedo y panico. Mas cu tur, ban laga e
trabou di combati criminalidad den man di polis!