Page 5 - UTILITIES 19 MAY 2017

Artista Ad Rekkers contento cu bishita di Prome Minister

Thursday, 18 May 2017 21:42
Comparti

Na momento cu cende e prome luz LED den e bario di Sero Preto na Paradera, esaki ta tumando luga
dilanti e percela 17-A.
Un cas unda cu e propietario ta sostene e vision di Gabinete Mike Eman II pa bay den direccion di
sostenibilidad. Esaki ta un pensamento cu ta wordo comparti door di diferente ciudadano den e bario
aki.

Durante e Accion di Bario den Sero Preto, Prome Minister Eman a combersa cu basta ciudadano, entre
otro riba loke cu Gobierno a haci caba y ta haciendo. E habitantenan ta apoya e maneho sostenibel cu
Gobierno kier introduci den diferente sector di bida. Un di e ciudadanonan aki ta Ad Rekker, ta un
pintor conoci, kende tin mas o menos 7 aña bibando den bario di Sero Preto. E ta contento cu e bario,
cu ta basta trankil y unda e ta biba ta un tiki leu di e trafico.

Rekkers ta gusta naturalesa y pesey ta contento cu e vision di Gobierno y Prome Minister Mike Eman. E
mes, segun el a conta, ta trata di haci hopi na proteccion di ‘berde’. E tabata hopi contento cu bishita di
Prome Minister Eman y a conta e mandatario cu “mi ta purba di duna mi contribucion. Na e parti patras
di mi cas, riba e dak, mi a pone panelnan solar. Door di esey mi ta paga menos coriente.” Rekkers ta un
persona cu ta kere fiel den sostenibilidad. No solamente e tin panelnan solar riba dak di su cas, pero
tambe e tin un auto cu ta core riba coriente. “Tur accion chikito ta yuda,”el a bisa.

Pa loke ta e bishita di e Prome Minister na e bario, el a bisa cu esaki ta algo cu e ta haya hopi tremendo.
“Ta hopi bunita cu e ta bishita e ciudadanonan personalmente y mi ta haya su iniciativa pa haci Aruba
mas berde posibel ta algo hopi bon. Mi ta apoya esaki y mi ta purba di participa den e pensamento
berde. Mi ta haya cu ultimo añanan el a logra hopi manera e panelnan solar na aeropuerto, e
molinanan di biento. Poco-poco Aruba ta birando mas berde y esey ta hopi bon.”

Apoya e pensamento di Gobierno riba sostenibilidad, entre otro den energia, e ta bisa ta nifica cu e ciudadano
mester haci un inversion na inicio y a lo largo esaki ta paga su mes.