Page 45 - RDA 1ST JUNE 2017

Richard Branson y Carbon War Room ta elogia Aruba y
Gobierno di Aruba ta felicita nos Arubianonan y

companianan di utilidad

Wednesday, 31 May 2017 20:22
Comparti

Durante e ceremonia importante pa groundbreaking di e Sunrise Solar Park, discursonan tabata un formalidad,
mas sinembargo e mensahe cu cada un a trece dilanti a keda resona den mente di esnan presente.
Nan ta manifesta e progreso grandi cu Aruba a conoce den e tereno di innovacion y sostenibilidad, pero tambe ta
duna merito na nos profesionalnan local pa nan aporte importante den e logro aki.
E parke solar cu den 8 luna lo ta cla y ta bay produci 5.9 MW di energia limpi ta ubica na Lago Heights. Aki
diaranson mainta a tene e groundbreaking den un manera simbolico caminda a laga crece e prome panel solar
riba tereno. Prome cu e parti aki, y den presencia di Su Excelencia Gobernador Alfonso Boekhoudt, Minister di
Energia ing. Mike de Meza tabata entre promenan pa hiba palabra.

“Awe mas cu nunca nos tin companianan di utilidad cu ta kere y ta wak. Nan ta haciendo esaki posibel y nos por
ta hopi orguyoso di esey. E cooperacion aki cu e companianan di utilidad ta hopi importante; nan ta e
ingenieronan,nan ta e profesionalnan cu nos mester pa haci e trabou,” asina Minister de Meza a bisa recordando
con 8 aña pasa mester a combence nan di tur e motibonan pakico e caminda di sostenibilidad tabata esun miho
pa Aruba. ‘Nos tabata pusha nan y nan tabata bisa nos: “Wanta, ban wak bon kico nos ta haciendo”; y awendia
nan ta pusha nos. P’esey ta great ora bo tin bo mesun expertonan local cu di berdad ta kere y ta ehecuta cosnan
di un manera hopi profesional y integral.’
Jose Maria Figueres a expresa cu Carbon War Room ta hopi complaci di ta parti di e componentenan cu hiba
Aruba riba e caminda cu e ta aden. “E caminda aki ta importante pa Caribe caminda lesnan ya caba ta wordo siña
for di e experiencia na Aruba y tambe resto di mundo. Pa tur esey, Carbon War Room ta gradici Aruba, su
gobierno y e companianan di utilidad; pa boso liderazgo, boso curashi y pa loke boso ta haciendo den mustra
mundo e caminda pa un futuro mas briyante,” asina e ehecutivo a indica.

Sir Richard Branson a haci eco di e palabranan di Figueres expresando cu tempo cu Carbon War Room algun aña
atras a pone e ‘10 Island Challenge’ nan no a realisa cu Aruba lo bay avansa asina lihe dor di di dje. “Y esey ta
danki na e dos Mike pa nan liderazgo y pa pone tur hende hunto tras di Aruba caminda cu awo en berdad nos ta
den direccion pa un situacion caminda Aruba por ta un di e prome paisnan cu ta traha riba energia limpi,” e
empresario global a bisa na esnan presente.
Minister President Mike Eman a tuma e oportunidad pa gradici Minister di Energia, WEB Aruba N.V., Elar N.V. y
ISOTRON como socio nobo atrabes di e proyecto aki, pa ta parti di e proceso. Eman: “No solamente boso ta
cambiando un direccion importante pa nos pais, pero tambe cambiando e standard mundial cu por afecta e
calidad di bida di hopi generacion den futuro.” Tambe a gradici Sir Richard Branson como inspiracion y pa finalisa,
e mandatario a bisa na tur esnan presente “cu Dios bendiciona boso tur y ban sigui den e direccion aki.”