Page 49 - ARUBA BANK
P. 49
ORANJESTAD (AAN): Sindicatonan di Trahadornan Publico a tene un conferencia di
prensa diahuebs mainta pa asina trece dilanti e ultimo desaroyonan relaciona cu nan
lucha pa haya indexering 2019.
Despues cu siman pasa, durante un rueda di prensa, pakico ta bin ariba mesa e topico
di indexering y di a duna di conoce cu nan a manda un cartanan pa gobierno, cual a
duna contesta pero sin contenido relaciona cu e propuesta di e gremio.
Segun Eduard de Cuba, vocero di e sindicato, e ultimo carta a wordo manda pa
gobierno siman pasa dia 9 di Juli unda cu nan ta bisa gobierno cu no ta dunando un
clarificacion duidelijk ariba papel pa locual ta trata indexering.
De Cuba a laga sa cu nan no ta hayando nada concreto pa locual ta trata e tema aki y
pa e motivo aki nan a manda e carta di dia 9 di Juli unda cu nan ta bisa gobierno un
bes mas cu mirando cu presupuesto lo mester wordo entrega 1 di September, nan ta
duna gobierno un ultimo oportunidad pa bin cu un propuesta pa por discuti ariba
indexering.
E fecha cu a bisa gobierno pa bin cu un propuesta ta dia 9 di Augustus 2019. Toch te
dia di awe e sindicatonan no a haya nada concreto di gobierno a pesar di e tantisimo
oportunidad cu e sindicatonan a duna gobierno indicando nan ‘standpunt’, Eduard de
Cuba a bisa.
PROTOCOL 2014
A reitera cu na tres ocasion, e trahadornan publico a haya indexering. Na 2010, 2011 y
2013. 2013 tabata e ultimo aña cu sector publico a haya indexering for di gobierno.
Na 2014 e sindicatonan a firma un protocol cu gobierno unda a bisa cu lo mester bin cu
un mecanismo cu desde 1 di Januari 2019 lo cuminza cu indexering. Kiermen no ta algo
cu e sindicatonan ta bin cune awo, a splica.
Gobierno, sinembargo, no a institui e comision y banda di esaki a tuma nota di un
declaracion di Minister di Finanzas unda e ta bisa cu e sindicatonan no tabata tin e
boluntad pa bin cu e comision pa traha ariba indexering, a indica.
