Page 132 - MIN VOS 5 APRIL 2017
P. 132
Bus di Salud cu chekeo medico pa staf y personal di KIA
Tuesday, 04 April 2017 17:36
Comparti
Recientemente Bus di Salud a bishita KIA pa ofrece chekeo medico basico na e staf y personal di e institucion.
Teniendo na cuenta e diferente warda y orarionan di trabao, e bus a para na KIA durante algun ora pa dia pa 4 dia
sigui. Arthur Dirksz, kende ta traha cu e “medische dienst” di KIA como nurse a expresa cu e idea tabata hopi bon pa
invita Bus di Salud pa ofrece nan servicionan na e trahadonan.
Den su departamento nan ta traha for di mainta, 8 ora pa dia y ta mira primordialmente e detenidonan, pero tambe
empleadonan cu por bira malo bao di orario di trabao. E iniciativa ta uno hopi bon, como cu e ta haci e trahadonan
consciente y alerta pa cu nan salud, segun Dirksz.
El a agrega cu e mes ta flaco, pero esey kiermen cu ta bon di salud y cada persona mester check y wak pa su mes.
Tambe ta importante pa cada persona eherce e disciplina y dominio propio pa cu su nutricion, cual no ta algo facil
como trahado di KIA cu e orarionan cu nan ta traha, el a remarca.
Na final cada persona ta responsabel pa su salud y e chekeonan cu Bus di Salud ta duna ta e persona un bon
indicacion riba kico ta e factornan cu e mester pone mas of miho atencion. “Enfermedad no tin edad y no tin status,
Arthur Dirksz a conclui bisando, p’esey mes ta bon pa ta consciente di e estado di salud personal.
Korrectie Instituut Aruba, KIA a muda pa su localidad na Santo di Patia na San Nicolas dia 22 di september 1990,
pues 26 aña pasa. E prizon tin un populacion di un maximo di 200 detenido, parti den detencion preventivo, seccion
di hende muhe y seccion di hubentud. Na KIA tin mas o menos 180 empleado trahando 24 ora pa dia pa garantisa
siguridad y atende cu e presonan den cuadro di e periodo cu nan mester sinta nan castigo cu e meta pa coregi nan
erornan y sali atrobe como miho ciudadanonan pa nos pais.
