Page 157 - MIN VOS 5 APRIL 2017

Pa 30 aña Margo Bennett-Themen a demostra amor y
dedicacion na pashentnan

Tuesday, 04 April 2017 18:45
Comparti

Recientemente Dr. Horacio E. Oduber Hospitaal a honra e empleado di luna di maart cu un sorpresa hopi grandi.
Como cu ela caba di bay oficialmente cu pensioen e siman anterior, Margo Bennett-Themen no por a pensa nunca cu
e reunion cu su Clustermanager a invit’e pa atende tabata en realidad un celebracion na su honor.

Zorgmanager di e departamentonan di Rehabilitacion, Functie y Endoscopia, sra. Rachel Kraaivanger ta splica cu
Margo a cuminsa como enfermera na Hospital y despues a bira coordinado di e Functieafdeling pa hopi aña despues
cu ela yuda establece e departamento ey.
Como cu desde dia 1 di februari ultimo sra. Kraaivanger a tuma over e departamento, na vispera di e despedida di
Margo Bennett, el a purba di traha hopi di cerca cune pa siña tur loke Bennett a siña den e mas di e 30 añanan di
carera na Hospital. Ela agrega cu loke mas a resalta ta e amor y dedicacion di Bennett, tanto na su pashentnan como
na su coleganan, y esey ta loke e kier adopta di Bennett den su trabao.
Maria Gei, kende ta secretaria di Functie afdeling for di 1998, a expresa cu Margo tabata un bon hefe, semper e ta
cumpli cu su trabao y debernan y ta yuda tur hende. Bennett ta haci tur cos posibel pa yuda e pashent, Maria Gei a
comparti, y ademas e tabata siña e secretarianan tambe con pa haci tur loke tabata necesario pa nan contribui na un
forma positivo na e departamento y e plannan di e departamento.
Durante di e celebracion, Margo a remarca cu e sorpresa tabata hopi grandi, como cu el a pensa cu e siman anterior
tur cos a caba; el a bay e reunion na Hospital trankilo y sin sospecha net nada. E Clustermanager a hasta splica e
presencia di su secretaria na e reunion, bisando cu el a bin pa “notuleer”.
Sra. Bennett a splica cu e tin hopi aprecio pa su manager, pa tur e personanan cu ela traha cune como cu e tin hopi di
gradici na nan pa cu su carera; e apoyo di su casa pa e por a sigui traha tabata sumamente importante pe.
El a expresa cu e ta stima su trabao masha, y e ta stima su hendenan; pero specialmente su pashentnan e tabata duna
tur loke cu tabatin pa duna.
Margo a subraya cu Aruba tin un solo Hospital, y e kier pa e ta un bon Hospital y semper ela haci tur esfuerso pa
traha cu amor y dedicacion. E ta sali tambe di e punto di bista, asina el a conclui bisando, cu awe e ta yuda un
persona, pero mañan por ta e mes ta esun cu mester di yudansa.
Pabien na Margo Bennett-Themen cu sigur a merece e logro y cierre bunita aki di su carera na Hospital.