Page 28 - MIN ARENDS

Bureau Innovatie ta organisa ‘Hackathon Oranjestad 2017’

Monday, 24 April 2017 19:46
Comparti

Diamars awo 25 di april ta tuma luga na Camara di Comercio un presentacion informativo relaciona cu e
actividad ‘Hackathon’ cu ta bay tuma lugar proximamente den capital di nos isla. Hopi ta esnan cu sa
caba kico ta e concepto tras di un hackathon, mientras cu otronan no y pesey ta importante pa tuma nota
ya cu bon ideanan por ta tur caminda.

Marlon Kock, IT Manager na Bureau Innovatie ta splica cu e ta un actividad caminda, den grupo,
participantenan ta sinta pensa, bin cu idea y consecuentemente cu un propuesta concreto como solucion
di un reto. Bureau Innovatie, un departamento cu ta resorta bou di Ministerio di Asuntonan General,
Innnovacion, Ciencia, Desaroyo Duradero, Sector Primario y Cultura lidera pa Prome Minister Mike
Eman, ta buscando diferente manera pa impulsa actividad economico, pero tambe social den centro di di
ciudad Oranjestad. Kico caya grandi por ta ademas di compras y horeca? E proposito ta pa hendenan bin
cu ideanan nobo cu por duna caya grandi un dimension nobo y experiencia nobo pa su bishitantenan.

E presentacion na Camara di Comercio ta den man di funcionario Kock mes y ta cuminsa pa 5’or di
atardi. Un y tur ta bon bini na sede di Camara di Comercio na Punta Brabo caminda lo comparti
detayenan manera inscripcion, cantidad di grupo, reglanan, etc. E hackathon mes tin un duracion di 24
ora y ta tuma luga diabierna 12 y diasabra 13 di mei proximo na un sitio den centro di ciudad mes cu
tambe lo keda anuncia durante e sesion di informacion. Pa mas informacion y pa registracion por bishita
website di Bureau Innovatie cu ta: www.bi.aw y tambe keda pendiente ya cu den prensa lo comparti tur
detaye nobo. Ta bon pa menciona cu Hackathon ta un plataforma ideal pa profesionalnan exhibi nan
talento y pa ciudadanonan trece nan vision dilanti.