Page 4 - MIN ARENDS

Cobra accijns den gasoline envez di number di auto ainda un posibilidad

Posted on 04/25/2017 10:11 am AST | Updated on 04/25/2017 10:11 am AST

ORANJESTAD – E concepto di cobra accijns den gasoline envez di impuesto riba number di auto tey
ainda. Mientras cu e mandatario mester a pone e idea ey ‘on hold’, e no a ‘muri ainda’. Manera ta
conoci, e mandatario tabatin intencion pa reemplaza e asunto di pagamento di number, cu e pagamento
di accijns den gasoline. Mas bo core, mas bo ta paga. Un asunto cu a wordo para abrubtamente na 2015
pasobra no a keda cla cu e ‘uitwerking’ di esaki na tempo pa introduci’e na 2016.

CAMBIO

Na October 2015, Bermudez a confirma pa e portal aki cu tabata definitivo cu pa 2016, lo no a conoce e
cobranza di number di auto, via e sistema di pago di accijns. Bermudez, a bisa e portal aki e ora cu
tabata trahando pa e keda cla pa introduccion pa 2017. E momento ey, manera ta conoci ,
Departamento di Impuesto a presenta e alternativa di pago di number di auto, den forma di un sticker,
envez di paga pa un plachi nobo.

SITUACION AWE

E concepto ta sigui segun Bermudez, pero tin algun ‘aspecto’ aden pa cierto categorianan di vehiculo cu
ta uza cierto fuel cu mester wordo resolvi. “Keto bay nos ta trahando riba nan” Bermudez a sigura e
portal aki. Esey ta e unico problema. Ora cu a puntra e mandatario si esaki por bira algo ainda pa 2018, e
mandatario a contesta. “Yaa..wak, e lo ta un tremendo alivio pa belasting dienst si bo por e ora ey
cancela henter e motor rijtuig belasting, si bo por cobr’e den accijns” Bermudez a bisa. Ora cu a puntra e
mandatario si e ta bira e ora un of e otro, esta sea accijns of plachi di number, e mandatario a bisa cu ta
sea un of e otro. Y aworaki ta mustra cu pa 2018, lo bin cu e plachi nobo. Mester bisa sinembargo cu
aunke recientemente e mandatario a sigura e portal aki cu pa 2018 lo introduci un plachi nobo
diferente, e portal aki a compronde cu toch esaki lo no por completamente mirando cu e
preparacionnan no ta cla pa por introduci e cambio pa 2018. Pero esey lo mester keda presenta
proximamente ainda.