Page 81 - MIN VOS

PAHO ta na Aruba pa sostene den salud mental y malesa no-
transmisibel

Monday, 06 February 2017 20:29
Comparti

Durante e bishita di dr. Xiomara Vidal di PAHO (Organisacion Pan-Americano di Salud)/WHO
(Organisacion Mundial di Salud) na Aruba, el a haci diferente encuentro di trabou pa reafirma e
convenio bi-annual cu PAHO tin cu Aruba. Tambe pa conoce nos sistema di salud di cerca pa asina crea
forma di sosten tecnico pa mehoracion.

E bishita aki ta forma parti di e trabounan di PAHO. Cada tanto tempo PAHO ta haci biahenan asina den
nos region pa duna sosten y cooperacion tecnico na e diferente islanan cu ta forma parti di PAHO y
Aruba ta un di nan banda di Corsow, Boneiro y islanan riba. Pa basta aña caba Departamento di Salud
Publico Aruba (DVG) ta trahando cu e organisacion aki pa asina trece mehoracion den nos sistema di
salud, mas tanto pa e parti preventivo y promocion di salud. Awo ta toca e temanan di salud mental y
enfermedadnan no-transmisibel (p.e. diabetes, malesa di curason, cancer, obesidad). Dr.
Xiomara Vidal, psikiatra y consehero di PAHO pa enfermedadnan no-transmisibel y salud mental, ta bisa
cu el a bin Aruba pa cera conoci, na prome luga, cu esnan trahando riba tereno di prevencion y
promocion di salud mental y di malesanan no-transmisibel… “y pa duna aporte na e programanan
preventivo relaciona cu e temanan menciona. Tambe pa cera conoci cu e sistema di salud mental y
enfermedadnan no-transmisibel na Aruba y e impacto cu e enfermedadnan aki tin riba nos poblacion. Na
Aruba e malesanan di curason, cancer y diabetes ta e prome causantenan di morto. E ta un situacion
general cu ta aparece na tur pais y particularmente den America.”

“E influencia di e factornan di riesgo pa nos poblacion manera alcohol, droga, tabaco, obesidad y
conducta psikosocial den nos hubentud y adulto mester wordo teni na cuenta y atendi debidamente,” e
experto di salud ta bisa. “E idea ta pa mi cera conoci y bishita e luganan di trabou. Esaki ta encera cu mi a
bishita tanto Departamento di Salud Publico como PAAZ y IBiSA. Nos a bin ta reuni cu diferente persona
y gruponan di trabou pa asina por tin un relacion mas estrecho, tambe identifica y cualifica cua ta e
aspectonan cu mester di apoyo tecnico y den ki forma PAHO por duna sosten y conseho. Nos lo studia y
traha riba e formanan pa actua y orienta con por resolve e problemanan specifico di salud na Aruba",
asina dr. Xiomara Vidal a conta di su bishita como representante di PAHO na Aruba.