Page 65 - AHATA
P. 65
Tin un preocupacion cu den futuro, condicionan por cambio y destinonan tropical
manera Aruba kisas no tin suficiente recurso pa promove e demanda turistico. E solo,
laman, y beachnan solamente no por competi den e mercado turistico global di islanan
chikito.
Tin bastante razon pa explora otro opcionan pa diversifica e producto turistico y
introduci elementonan cultural cu ta unico pa e destino-Aruba. Aki ta referi na un
historia bibo—un atracion unda ta trece bek nos historia di nos antepasadonan pa atrae
e turismo global.
Atracionan di e turismo patrimonial tin fuentenan tangible manera lugarnan culto,
edificionan historico, restonan arquitectonico, como tambe filosofia intangible antigua,
tradicionan y ceremonianan cultural. E atracionan cultural ta capaz di produci
eventonan historico, educacion, y entretenimiento pa e publico.
Ningun isla por copia otro—pasobra cada isla tin su propio y unico historia cultural. E
santo blanco di nos beachnan, e cayente di e solo, y e laman blouw nos por hanja tur
otro caminda similar na nos isla.
E intencion di Prof. Lasten ta pa trece e autenticidad historico cultural bek na bida pa
islanan chikito manera Aruba. Paisnan grandi a tuma ventaha di e islanan door di a hasi
nan colonia y pesey nan a perde nan originalidad y e paisnan grandi cu dominio riba e
islanan den pasado a trata pa e islanan sigui solamente historia di e madre patria
lubidando nan propio cultura y tradicionan.
No por semper “copy paste” otro paisnan grandi ariba varios tema y laga nos mes como
pais chikito manera Aruba atrás den pensamento, participacion, creacion, y innovacion.
Nos tin un historia mas grandi y amplio pa conta mundo, sin tene cuenta cu nos solo,
laman, y beachnan.
Prof. Lasten tin un modelo, e metodologia, un blueprint pa crea e di cuarto elemento
(apart di e solo, laman, y beachnan) pa genera un valor economico adicional pa nos isla
Aruba. Su experticio ta basá riba un estudio cu varios colección di datos cientifico rond
mundo manera na Massachusets, Orlando, Florida, Illinois, Hawaii, y Aruba.
